المفاتيح السريّة 🗝✨

أنا بشكل عام بتمسك كتير بالأشياء يلي بتحمل ذكريات!

ولو انو هالصفة تراجعت عندي بانشغالي بحياة الأمومة الفوضوية، بس من فترة فتحت علبة فيها مجموعة أوراق وأشياء تانية قديمة كنت محتفظة فيها ونسيانتها 🥀

بعد ما شفتها حسيت باحساس كتير حلو! واكتشفت أديش كان في بحياتي تفاصيل صغيرة ممتعة ومبهجة! 🌱

حابة ارجع عيش هادي التفاصيل ان شاء الله ورح شاركها معكم ❤️

Continue reading “المفاتيح السريّة 🗝✨”

Advertisements

محصلة نهاية عام ٢٠١٧ 🥀

كنت حابة بنهاية السنة إني ساوي فنجان شاي وافتح لابتوبي اتفرج على كل الصور يلي فيها نجاحات هالسنة 💔

الحمدلله أكيد كان في نجاحات (حتى لو كانت قليلة وبطيئة جداً) بس خطرلي أنو يمكن لازم شارك الحقيقة ورا هادي النجاحات:

هون رح تشوفو معلومات جديدة عن حياتي كأم لأول سنة كاملة بكل جوانبها “الحقيقية”

1. أنا لسا لهلأ ما اتعودت على روتين التنضيف!

أول ما سكننا سوا أنا وسليم بشقة خاصة فينا كنت أنا وقتها حامل بالشهر التامن.

ولحد الآن ما صار عندي فرصة أني اخلق روتين يومي ناجح لترتيب وتنضيف البيت وهاد الشي بعتبرو مُعيق كبير كتير للإنتاجية بيومي وبينشر كمية طاقة سلبية هائلة 💔

img_5228img_5227

2. لسا لهلأ عم شوف صعوبة بتقبُّل واقع أني أم ومسؤليتي صارت ٣ أضعاف!

وعم حاول وبشدة إني لاقي الصيغة المثالية حتى طوّر مهاراتي كأم بالدرجة الأولى وبعدها التفت لشؤوني حتى اقدر اجمع بين المجالين، بس هاد الموضوع جداً صعب وبيحتاج تركيز وتفكر واسترخاء وهالأمور كلها شبه مستحيلة بمسار يومي المكركب 🤷🏻‍♀️

3. ضريبة الشبابيك 🌿

مقابل المنظر الحلو يلي بتشوفوه من شبابيك شقتنا، نحن مضطرين نسكن بضاحية مواصلاتها صعبة كتير ومتعبة ومكلفة وهالوضع صعب جداً وبخليني ما اعرف اتحرك مع سلمى أبداًوبنتظر ليكون سليم معنا حتى نطلع من البيت سوا 🌚

img_5226

4. “الحجم قد يكون أصغر مما يبدو في الصورة📦

بتذكر لما اجت الماما من جدة أول مرة وزارتنا بشقتنا، قالتلي “ييي كانت مبينة شقتكن على الانستاغرام أكبر بكتير!!) 😂😂😂

وهاد توضيح لازم تعرفوه يا صديقاتي، انو الصور والفيديوهات يلي على الانستاغرام (وبالرغم من كل جهودي للحفاظ على واقعيتها) أبداً أبداً ما بتعبر عن الجو المتعب بهالمكان💔

5. 💸

من سنتين لما كنت ساكنة بجدة، كنت ساوي أساور الصداقة وبيعها وكنت درس طلاب باللغة الانكليزية وكنت ساوي أفلام ستوب موشن لطلاب المدارس والجامعات والمؤسسات الاجتماعية… وهادي الأعمال كلها كانت الطريقة يلي اشتريت فيها لابتوب وكاميرا! وكان هاد أحسن شي ساويتو بحياتي العملية! 🙌🏻

بس حالياً:

أنا متأكدة أنو ٩٠٪؜ من الناس يلي عم تقرأ هاد البوست أوضاعها المعيشية أحسن مننا بكتير 😂🌚

والفيديوهات يلي بتشوفوها على اليوتيوب بتطلع روحي أنا وعم ساويها على لابتوب قديم وبطيئ وبيتشغل بمعجزة،وما بيتحمل غير برنامج الفوتوشوب (يلي عم استعملو لعدل الفيديوهات وصمم المطبوعات 😂)

يمكن بعد ما احكي هاد الكلام رح شوف أنو النجاحات البطيئة والصغيرة هي فعلاً بطيئة وصغيرة!

بس حقيقية! ومناسبة لوضعي يلي بقيت سنة كاملة ما عم اعرف اتقبلو 🌚

img_5225

أسئلة نوفمبر 🌬

كنت عم فكر بالأشياء الي كانت مفضلة عندي بشهر نوفمبر، ما حسيت أنو صار في علاقة حلوة بيني وبين حيلا شي جديد بهالشهر 🤷🏻‍♀️

بس كان عندي الكثير والكثير من الأسئلة ✨

طبعاً ما شفت أجوبة لكل الأسئلة! بس كانت أسئلة عميقة وكتيرة بالنسبة لشهر واحد 🌚

لذلك ☝🏻 رح اكتبها هون لأنو هالأسئلة حسيتها كانت سبب بتوسيع الأفق أو وعي بأشياء مدفونة بعقلي الباطن من زمان وممكن تفيدكم أو تعطيكم الهام تساوو نفس جلسة الأسئلة 🤷🏻‍♀️

ملاحظة: رح اكتب الأسئلة بدون الأجوبة مشان يبقى سحر بالموضوع 💫

س١: ليش غالباً أنا بعرف المعلومة وبرددها بس نادراً ما نفذها؟

س٢: ليش بقدر حلل موقف خاطئ لحيلا شخص وطالع دوافعو ونواياه، بس نادراً ما اسمح لشخص يقول عني غلطانة ويشرحلي دوافعي ونواياي برأيو؟

س٣: شو السر بتحكم الذكور بالإناث؟ ظلم من الرجل أم خضوع من المرأة؟

س٤: اذا بقيت عم قيم الأشخاص وانكش عيوبهم واقصيهم من حياتي بسبب قلة الكفاءة! رح ابقى وحيدة بالنهاية؟

س٥: ايمت بقدر استسلم؟

س٦: وايمت لازم اندم؟

س٧: وين الصعوبة بالاستمرارية وليش تحقيقها شبه مستحيل؟

س٨: عنجد خلص الخريف بهالسرعة؟؟! 😅

س٩: ليش بفيق كل يوم وبنتظر شخص يدعمني ويعطيني طاقة لأبدأ يومي؟ ليش أنا مابعرف ادعم حالي؟

س١٠: لو كل شخص عندو تعريف خاص بالحب، كيف ممكن يكون في أرضية مشتركة لعلاقة محبة بين شخصين؟

س١١: شو الفرق بين التسليم والاستسلام؟

اكتفيت بـ ١١ سؤال حتى يناسبو شهر نوفمبر 🌚

وفعلياً باقي شهر لنهاية السنة وهادي مرحلة تقييم عظيمة بتستدعي هالأسئلة وزيادة 😂💔

شو في اسئلة عميقة خطرتلكن هالشهر؟ 🤔

صديقي سليم 🌻

مبارح كانت أول منشتري فرشة لتختنا 😂😂😂💔

اي من لما اتزوجنا ما صارتلنا فرصة نجهز ونفرش بيتنا وسكنا ببيت قديم كتير ومفروش فرش لسا أقدم وبقينا سنة وشهرين نايمين على صوفا مفتوحة ومعتبرينها تخت 🌚

رح ارجع شوي بالأحداث لورا:

Continue reading “صديقي سليم 🌻”

اعترافاتي لسلمى بيوم ميلادها الأول 🌟

صديقتي الجديدة سلمى:

أجمل احساس عطيتيني ياه أنو مانك جزء مني! ما بتشبهيني بالشكل أبداً، وكمان أغلب طباعك ما بتشبهني 🤷🏻‍♀️

وهالاحساس كتير حلو لأنك وفرتي علي الوقت حتى اتأقلم مع كونك كيان وعقل مستقلَين ❤️

ومن بداية مشوارنا سوا كنتي كتير مميزة بالنسبة إلي ✨

ببداية شهور حملي كان عندي احساس حاسم بأني حامل بصبي وبالشهر الخامس عرفت انك بنت ❤️ وكانت أعظم فرحة على الاطلاق ❣️

وكانت حركتك كتيرة بالشهر التامن من الحمل وهالسبب خلا الدكاترة يعتقدو باحتمال حدوث ولادة مبكرة بس انتي قررتي تبقي ٩ شهور كاملين واسبوع ببطني

عطوني مدة ٦ ايام بعد نهاية الشهر التاسع كفرصة أخيرة لولادة طبيعية بدون تحريض، بس انتي قررتي عند نهاية المهلة بالضبط انك توفري علي التحريض وتجي على عالمنا بسلام 🌟

وأول لحظات لئلك بين أيدي ما بكيتي أبداً!! وبقيتي بحضني أكتر من ٥ دقائق عم تبادليني نظرات الاستغراب والفضول بكل هدوء 💔💔

كان شعرك كتــيــر طويل وحلو وأسود لامع ✨ وكنتي حجمك كبير مقارنة بالاطفال يلي بعمرك، وهالشي خلا علامات الاستغراب تجيكي من كل الاشخاص أول ما يشوفوكي ❤️❤️

ومن تاريخ ٤/١١/٢٠١٦ سمعت جملة “zu viel haare!!” وجملة “ein großes mädchen!!” من الناس الألمان ألف تالاف مرة 😂🤷🏻‍♀️

وكتير حاولنا معك حتى تأعدي بس كنتي عصبية وتحبي تبئي نايمة على ضهرك او على جنبك وبعدين فجأة لما كان عمرك ٦ شهور جربت وأعدتك على الأرض وطلعتي بتعرفي تأعدي لحالك مابعرف كيف! 🤷🏻‍♀️

وعندك ردات فعل مميزة بتساويها لما بتعصبي، بس مامنعرف أبداً كيف اتعلمتيها او ليش؟!

متل لما بعد كل كلمة “لا” لازم تعضي الشي يلي بين ايديكي 😂

ومتل لما بس تسمعي حدا عم يضحك بصوت عالي بتصيري بتصرخي علينا وكأنك مزعوجة من صوتنا! 😂

أنا كتير فرحانة باختلافك واستقلاليتك وشخصيتك الحلوة ❤️

وكتير بحب كيف بتعطيني حنان أكبر من يلي بعطيكي ياه!

وكتير بحب الدافع يلي بتعطيني ياه حتى اشتغل على حالي اكتر و اقدر نال إعجابك بس تكبري ❣️

من مذكراتي| الهروب

web 4.jpg

الاثنين: 20/10/1017  الساعة: 5:30 م

الهروب:

أغرب احساس عشتو خلال الولادة كان (آلام الهروب)

كنت كل ما واجه وجع الولادة بالهروب حس بتشنج أكتر ويزيد الوجع أكتر! وكل ما استقبل الألم باستسلام واسترخاء يختفي تماماً!

وبعد الولادة عشت 3 شهور مبنية على الهروب،… الهروب من فكرة الأمومة وفكرة المسؤولية وفكرة التعب المستمر، والحب الغير محدود.. والهروب من الخطوات الكبيرة والمخيفة.

وكان الهروب دائماً يسببلي ألم أكبر وهم أكتر!

كنت يومياً لما فيئ مع سلمى بلّش يومي بالهروب!

طبعاً لما بفيئ الساعة 8:30 ص وبكون لسا نعسانة كتير .. آخد سلمى من السرير واعطيها وجبة الرضاعة الصباحية، وبعدين مباشرة ببلش الهروب : من نقص النوم والراحة إلى القهوة حتى ابدأ يومي بنشاط وقوة..

بس فعلياً كل الطاقة الموجودة بالقهوة ماكانت تقدر تتغلب على قوة ألم الهروب!

لأنو احساسي كان دائماً متعب بفكرة إني لسا ماشبعت نوم وأنو الأمومة صعبة وأنو هالمخلوق الصغير هو سبب تخلّفي عن كل أحلامي والشغلات الحلوة بهالحياة!

بس من فترة بطّلت اهرب (بالصدفة) وصرت لما اصحى مع سلمى بدل الهروب للقهوة، استسلم لصباحي الجميل مع ابتساماتها! واستسلم لكل التفاؤل والحب يلي بأصابعها الصغيرة ❤️

واستقبل ألم المسؤولية وكل هالمشاعر الهائلة يلي كنت خاف على قلبي انو يعيشها.. صرت استقبلها بسعادة 💕

وصارو الـ 20 دقيقة يلي منأضيها عم نلعب سوا بالتخت كل يوم الصبح، أقوى من القهوة والهروب، وأقوى من أي محفز داخلي ممكن احكيه مع حالي.

شكراً سلمى على هالدرس الغير مقصود، يلي رح يخليني كل يوم ذكر حالي إني بطل هروب💕

web 3web 2web 1web 5