في سؤال ببالي.. ولسا ما بحثت بعمق عن جواب، ولو اني بعرف انو هيك جواب بيحتاج دهر وحكمة حتى استنتجو!
بس رح احكي القصة بالأول وبعدين بطرح السؤال وبتخبروني برأيكم فيه 🤔
البداية بسوريا، ربينا من نحن وصغار ببيئة متناقضة جداً وكثيراً! دينياً، أخلاقياً، والأهم عقائدياً!
لحسن الحظ (ربما) كنا دائماً محاطين بأصحاب دين!
مستمرين بشكل بطيئ بحفظ القرآن من طفولتنا ومنحضر مجالس دينية “نسائية” باستمرار..
وبوقتها وقت آنستنا تحمسنا على الصلاة كنت صلي بحب!
ولما سافرنا وانقطعنا، التأثير اختفى! وهاد جداً طبيعي.
هون فعلياً الاختبار العظيم.. اختبار الإيمان الحقيق واختبار الثبات..
ولما سكننا بألمانيا انتقلنا لمرحلة أعلى من الانقطاع!
مثال صغير بيشبه حالتنا: الحالة المنتشرة جداً، وقت بنت عادية جداً بتنخطب لشخص بيطلب منها تلبس بطريقة محتشمة اكتر، طلب صحيح مافيه أي خطأ طبعاً لأنو ما عم يطلب منها تغضب ربنا بالعكس عم يطلب منها ترضيه،
بس هي بتلبس هيك بس حتى ترضي خطيبها، ممكن تعيش حياتها وتموت وهي بتلبس بالشكل يلي بيرضي ربنا ومقتنعة بهالكلام، او ممكن ينفصلو! ووقتها رح يكون اختفى سبب الحشمة وترجع للبسها الطبيعي سابقاً! هاد مجرد مثال لحالتنا العامة..
يعني وقت منكون ضمن جماعة بيكفينا انو عم نساوي متل ما الكل عم يساوي “طالما هو شي بيرضي ربنا”
والامتحان بيجي لما منضطر نترك هالمجتمع ونطلع، ويختفي سبب التزامنا! وقتها مننتبه قديش رصيدنا الشخصي قليل!
متل وقت منكون بعزيمة كبيرة عند ناس متلنا، بيقومو ليصلو ومنتذكر معهم ومنصلي سوا!
بينما وقت منكون بمكان متل محاضرة طويلة بدولة اجنبية، فجأة بيمرق الوقت ومننسى نصلي..
هالموضوع خلاني فكر بعمق، يمكن انا اقدر اتخطى هالامتحان، بس انا مسؤولة عن تربية بنتي بمجتمع غير مسلم “غالباً لا يؤمن بالديانات أساساً” لهيك لازم اعرف جواب هالسؤال:
بيكفي انو نساوي الصح؟ ولا لازم نساوي الصح للسبب الصحيح حصراً؟؟
حالياً وصلت للسؤال، وبعدها بتبدأ مرحلة البحث عن الإجابة 🙌🏻
يسرني سماع اقتراحاتكم لمصادر او أسماء كتب أو تجارب شخصية بهالموضوع ❤️✨
