ليش لازم نطبخ لأطفالنا؟ 🥘

هاد الشهر صار عمر سلمى سنتين! يعني تقريباً صارت عندي خبرة سنة ونص مع أكل الأطفال 🙌🏻

لاحظت نقطة مهمة جداً وبتأثر كتير على تفاعل الطفل وتقبل الأكل يلي منعطيه ياه، بس بالبداية شوفى البوست القديم يلي حكيت فيه كيف عرفت سلمى عبى الخضار والفواكه لأنو فيه معلومات مهمة جداً 👇🏻

weaning journey with Salma | رحلة التعرف على الطعام مع سلمى

ببداية تعاملي مع اكل سلمى كانت تجيني رسائل ونصائح متناقضة متل يلي بتجي كل ام جديدة!

بس أنا دائماً كنت حاول اسمع معلومات مختلفة وخلي حدسي يمشيني بالقرار يلي بيناسبنا حالياً، لمرة اجتني فيها رسالة انو ما تطبخي لبنتك أكلة منفصلة! خليها تاكل معكم من طبخ البيت وإلا بس لتكبر بتصير بتكره الأكلات يلي بتساويها..

توضيح : هالنصيحة خاطئة وبشدة!

من أكتر الأيام يلي بشوف سلمى فيها عندها شهية على الأكل هي الأيام يلي بطبخلها فيها طبخة بتناسب احتياجاتها وعمرها، وبعدين وقت بيجي وقت الغدا منجتمع كلنا على الطاولة وسلمى بتاكل معنا كمان 🤷🏻‍♀️

الغلطة يلي بتصير عادةً هي انو الاهل ماعندهم أفكار لأكل الأطفال، وهاد طبيعي جداً! لهيك الأهل بيقدمو للأطفال وجبات الكبار بس بحجم أصغر وإضافات أقل!

مثلاً من مدينتي ، بيقدمو للطفل أكتر شي :

رز ولبن

موز وتفاح

ساندويش جبنة او زعتر

وكل البسكويتات والتسالي المناسبة لعمر الطفل

وحليب وبيض

كلها أكلات بسيطة وسريعة وما بتحفذ حاسة التذوق عند الطفل!

بينما وقت منقدم للطفل نكهات جديدة باستمرار رح يكبر الطفل وعندو تقبل للأكلات المختلفة سواءً وجبات الأطفال او الكبار 🙌🏻

بعرف تماماً قديش مهمة الطبخ مزعجة وأغلب الأمهات نهارهن مشغول جداً، لهيك رح شارك معكم نصائح  لتسهيل الطبخ للأطفال  ❤️

الشوي بالفرن

وحدة من خياراتي المفضلة ويلي بستعملها أكتر شي !

بشوف شو عندي خضار بالبيت وبقطعها بحجم مريح لأصابع سلمى وبشويها بالفرن مع ملعقة زيت الكنولا او زيت الزيتون ومع توابل، وبقدم جنبها صلصة للتغميس او خضار تانية متل بندورة ، خيار ، خس ، بابريكا

 خيارات سريعة متوفرة بالبيت دائماً

غالباً بستخدم معكرونة صغيرة على شكل نجوم او أحرف بتنطبخ بسرعة وسهلة على سلمى انو تاكلها بالملعقة 👌🏻

ووقت بكون جداً مستعجلة بطبخها بس مع لحمة مفرومة ناعمة وصلصلة بندورة وتوم وريحان.

كمان الكوسكوس بكتير أحيان بستخدمو وبطبخ معو بصل وكوسا مثلاً ومعهم لبن وممكن تضيفوه جنب الخضار المطبوخة

استخدمي الخضار المبشورة لتسريع الطبخ

عنجد هالخطوة بتفرق كتير بمدة الطبخ، الجزر دائماً بستعملو مبشور بأكل سلمى، كمان البطاطا المبشورة ممكن ساويها مع بيض وبقدونس مقطع وتوابل وبساويها متل البانكيك او ممكن تنعمل بالفرن متل كب كيك

احتفظي بخضار مقطعة بالثلاجة

ولو اني بفضل الخضار الطازجة، بس وقت بيكون ماعندي وقت لغسل وتقشير وتقطيع الخضار، وقتها باستعين بالخضار المجمدة..

دائماً عندي جزر مقطع مع ذرة وبازيلا بالثلاجة، بحطها مع معكرونة وصلصة وبتكون وجبة سريعة او مع كوسكوس او بطاطا ..الخ

اطبخي الأكلة الواحدة بكمية مضاعفة

قدمي جزء من الوجبة هي وطازجة واتركي الجزء التاني ليبرد وبعدين حطيه بالتلاجة واكتبي عليه تاريخ اليوم، وبعد يومين تلاتة بس تكوني مشغولة بيكون عندك وجبة جاهزة بالثلاجة!

لنتيجة مضمونة:

وقت بتشوفي الطفل ماعم ياكل بشهية كبيرة او بياكل لقمتين وبيرفض يكفي الوجبة معناها في شي غلط!

انتبهي لوحدة من هدول الأسباب:

الطفل مريض او عم يبدي علامات مرض؟

لأنو وقتها طبيعي جداً يكون فقد شهيته للأكل 🌚

الطفل بياكل سناكات وتسالي خلال النهار متل البسكويت او الشيبس او السكاكر؟

هادي النقطة تحديداً بتخلي أكل سلمى يفرق من جيد ، لسيء جداً!! وقت بيكون في بالبيت بسكويت او كيك وبتاكل منو بين الوجبات، بصير وقت بطبخلها بترفض تاكل وأنا وقتها بحس بالإحباط اني تعبت وطبخت عالفاضي 🌚🌚 بس وقت مابعطيها غير مرة وحدة شي نوع من الفاكهة وقتها بتفتح شهيتها لوجبة الغدا او العشا.

لسا ما مر وقت طويل بين هادي الوجبة والوجبة الماضية؟

داااائماً بتصير هادي الشغلة على العشا، نحن منتغدا على الساعة ٥ العصر تقريباً وسلمى بتتعشى الساعة ٧:٣٠ المسا وغالباً بتكون لسا ماجاعت تماماً لهيك غالباً بترفض تاكل وجبة العشا إلا إذا قدمتلها شي مغري جداً 😂👌🏻

الأكلة يلي عم تقدميلو ياها بتقدميها باستمرار؟

قد ما كان الطفل بيحب الاكلة، وقت بتعيديها أكتر من مرة بيفقد رغبته بأكلها للأسف! لهيك التنويع بيضمن انك تجهزي اكلة والطفل ياكلها عنجد وماتضطري تكبيها بالزبالة 😅

النصيحة الأخير والأهم 🙌🏻

لا تخافي تخلي طفلك يجوع!

سلمى من لما بلشت تحكي وهي بتعرف كلمةنينيمعناهاأكلبس لشهور وشهور ماكنت تستخدمها! لانو ببساطة ما كانت تلحق تجوع 😅

كنت انا عم اعرض عليها الأكل باستمرار وكنت عاني معها بانو تاكل شوي وتكب الباقي..

بينما بآخر شهرين اتعلمت اني جهز الاكل بالوقت يلي بتوقع انها رح تجوع فيه بس ما بقدملها ياه لحتى تجي لعندي وتطلب الأكل!

وقتها بضمن انو هي فعلاً جاهزة تاكل بشهية 🙌🏻

تمام أنا خلصت كل المعلومات الي عندي 😂🙌🏻 شاركوني بالتعليقات أي نصائح شفتوها فعالة للمساعدة بأكل الأطفال ❤️

Advertisements

2 thoughts on “ليش لازم نطبخ لأطفالنا؟ 🥘

  1. حبيييت شكرا كتير عل نصائح وفعلا في نقاط متل الفترة بين الوجبة والتانية اديش بتأثر 🤗💕
    انا ابني عمره سنه وصراحة ماعندي هل خبرة عم جرب واكتشف بس عطول بحب نوع بالبهارات مع المكونات يعني مثلا رز مع خضار بحط معو قرفة وكركم وفلفل شوي
    وممكن نفس الخضار حط معا اريجانو و بودرة توم هيك بصير بجرب اكتر من نكهة 🤗مع العلم انو البهارات مابتضر الولد متل ما البعض بفكر

    وكمان نصيحة تاني الدهون المفيدة متلا بحب ضيف زيت زيتون بأخر وقت الطبخ حتى ماتروح فايدتو
    والشوفان بحب ضفلو زيت جوز هند كتير مفيد ومابيتأثر بحرارة الطبخ 🙌🏻

    وآسفين عل اطالة بس عنجد حبيت شارك هل شغلتين
    سلامي لألك ولسلمى الحلوة 🌷💕

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s