رحلة اللجوء (الجزء الأول) 🌖

رح بلش معكم بسبب لجوئي لألمانيا:

كنا أنا وسليم مخطوبين بسوريا بنهاية عام ٢٠١٢م

طلعنا على مصر ببداية عام ٢٠١٣، سليم بقي هنيك وأنا صرت بالسعودية- جدة لبداية شهر اغسطس/٢٠١٥

حاولنا كل الطرق حتى نجتمع ببلد واحدة!

كان هاد هدفنا، وبحكم جواز سفرنا السوري (العاجز) ما كنا نقدر نلاقي هالبلد!

لهالسبب طلعنا سوا (مع اخواتي) على تركيا ومن هنيك بلشنا رحلة لجوءنا لألمانيا 💔

كل مابرجع بتذكر هديك المرحلة بستغرب الدافع القوي يلي كان يدفعنا نكوِّن عيلتنا أنا وسليم سوا!

على فكرة ماكان في بيننا “عشق مجنون أو حب عاصف” كان بيننا اختلاف شامل بكل جوانب الحياة والرغبات!

بس كنا منعرف تماماً انو كل واحد فينا بيبحث عن صفات محددة بشريك حياتو، وهالصفات شايفينها ببعض 🤷🏻‍♀️

ببداية علاقتنا كنت رافضة اني كون ضعيفة لهيك ما كنت استسلم للحب! الحب القوي ببداية العلاقات بيخلينا نغمض عيونا عن عيوب بعض!

وكنت بعتبر العيلة الناجحة لازم تبدأ بمواجهة العيوب بصوت عالي، وتصحيحها كتمهيد لاستقبال الاطفال 😅

بس كمان أنا بحياتي ما آمنت بالحب بعد الزواج 😅

توضيح 💡: أنا حالياً مؤمنة ١٠٠٪؜ بأنو الحب بيكبر مع الأيام وبيتغير شكلو باستمرار ❤️✨

بيوم ميلادي ٥/٨/٢٠١٥ كنا باسطنبول وكتبنا كتاب زواجنا عند الشيخ بوجود بابا واخواتي💔

كانت ذكرى تعيسة!! 💔

بتذكر اللحظة يلي كنا فيها قاعدين بالليل بمطعم وكنا مضغوطين كتير من التخطيط لرحلة اللجوء الخطيرة، ووقتها كمحاولة مني لتلطيف الجو

قلت: على فكرة لسا المحبس بأيدي اليمين 😅

سليم: هاتي ايدك 😠 خلص صار المحبس بايدك اليسار!

😂😂😂

نعم، نعم هادي كانت مراسيم زواجنا!

بدون فستان أبيض، وبدلة عريس رسمية، وبدون اهل واصدقاء يفرحو فينا وبدون موسيقى أو بهجة أو اي شي حرفياً!

img_6852

img_6851

img_6850

img_6849

بداية كل زواج بتكون مليانة اكتشافات وهادي هي اصعب مرحلة:

تصنيف الاشياء يلي رح نكتشفها ببعض بين أشياء لازم نتقبلها ونعيش معها بساعدة للابد وأشياء لازم نطالب بتغييرها ونتحمل صعوبة هالتغيير!

نحن عشنا هادي المراحل على الجبل يلي اتسلقناه بالليل قبل ما نطلع من تركيا وعلى الجبل يلي اتسلقناه بدون مي او اكل او اتصالات لما وصلنا حدود اليونان، وعلى طريق الحمام يلي بعيد عن المخيم ١٠ دقائق مشي بجزيرة تيلوس اليونانية 💔

كان في لقطة من مسلسل سوري اسمو (غداً نلتقي) بيكون فيها الممثل عبد المنعم عمايري بدور (محمود) سكران وعم يندب مصيبتو بجملة “يا صديقي أنا لا أندب حالي، أنا لا أعرف حالي … العصافير بنت أعشاشها وأنا في هذه الدارة وحدي.. جاثماً كاللعنة كالخوف على صدري الجبان، جاثماً كالموت كالبرهة في كل مكان..)

كنا عم نقول هالجملة سوا نحن وماسكين ايدين بعض وعم نتسلق هديك الجبال، وباليخت يلي قطعنا فيه البحر، وبالسجن يلي دخلنا مرتين بهنغاريا، وبالخيمة الباردة المبللة يلي قعدنا فيها على حدود مقدونيا 💔

لهيك مننادي بعض باسم “صديقي” ✨

هالسنة قررنا نغير موعد ذكرى زواجنا، لأنو هي أساساً ذكرى تعيسة 🌚

وساويناه بيوم عيد الحب! حتى نعتبر أنو كل الناس يلي عم تحتفل بهاليوم معزومة على عرسنا 💃🏼

img_6848

بـ ١٤/٢/٢٠١٨ حتى بوجود سلمى وحتى بامكانياتنا المادية التعيسة للغاية!

كان احتفالنا بوجبة غدا بمطعمنا الصيني المفضل ببلدتنا الصغيرة ❤️

وكانت هدايانا لبعض هي رسائل كتبناها واتبادلناها المسا وقرأناها لبعض ✨

بس هيك!

الغريب أنو كنا كاتبين برسائلنا لبعض نفس السطور بس بكلمات مختلفة ❤️

كنا كاتبين أنو هاد فعلياً هو أول ذكرى لزواجنا وأنو الحب الحقيقي اليوم ابتدأ بحياتنا ❤️

يعني الحب بيجي بعد الزاوج! لطالما الاختيار صحيح ✨

صديقي العزيز سليم:

متل ما حملتني على حدود مقدونيا حتى ما تدعسني العالم يلي كانت عم تحارب هنيك، انت عم تحملني بكل خطوة بحياتنا حتى لو ما عطيتك امتناني بالمقابل 💔

شكراً لصبرك معي وتقبّلك لكلامي بكل حالاته ودعمك المستمر 🥀

Advertisements

27 thoughts on “رحلة اللجوء (الجزء الأول) 🌖

  1. حقيقي مريتو بمراحل صعبة جدا بحياتكم بس دي حاجة بعتبرها ميزة مش حاجة سيئة فكري ان لولا الصعوبات دي مكانش ممكن تقوى علاقتك مع سليم للدرجة دي لو في الظروف الطبيعية كان ممكن تتزوجو زواج تقليدي جدا وتعيشو اول كم اسبوع من الزواج في سعادة وبعدين تبدا الحياة الروتينية المملة بين الزوجين لكن المغامرات دي سمحتلكم انكم تكونو اقوى بكتير وانتو جمب بعض وكمان صار عندك مغامرات حلوة تحكيها ل سلمى بس تكبر شوية تعرفيها قد ايه أبوها وامها تعبو عشان تيجي العسل سلمى على الدنيا بهنيكي من قلبي على قوة تحملك وبتمنى مع الايام تتحقق كل أمنياتك وتفضلو مع بعض طول العمر ماشاء الله عليكم الله يحفظكم 💙💙💙 حب كبير إلك ولعائلتك الجميلة

    إعجاب

    1. كلامك صحيح ١٠٠٪؜ على الطريق سليم عرف قديش الحجاب ممكن يكون الحفاظ عليه متعب ومرهق لهيك صار بيقدّر كل امرأة محجبة، وكمان انا شفت أديش حمل الزوج بيحمل مسؤوليات كبيرة ومعقدة نحن ماكنا نفكر فيها 💔
      للاسف بحس الدنيا ما بتعلّمنا الا بالطريقة الصعبة والمؤلمة 🤷🏻‍♀️ الحمدلله ✨

      إعجاب

  2. بتجننو لله يعوضكون بأيام احلا واحلا وتكون مليئة بل رفاه والحب والسعادة كل مرة بقرأ عنكون بتعطوني الهاام كبير وبحس اسا في حب ورحمة ومودة💝🌷

    إعجاب

  3. حقيقي السوشيال ميديا بتظلم رؤيتنا للناس (أو العكس؟)، معرف بس دي ثاني صعقة اخدها بعد بوست “محصلة نهاية عام 2017″، كنت أظن انو الحياة سهلة إلى حدٍ ما و الوضع مستقر، بس جاتني الصعقة الثانية دحين، أحس شوية بالخجل من نفسي بعد ما عرفت هالقصتين، لأسباب كثيرة (أغلبها أسباب عني فما تشيلي هم)، دايمًا بنكرر انو على السوشيال ميديا بنشوف ربع الحقيقة أو نصها و انو مو شي نحكم على أساسه، بس اليوم اللي فعلاً استوعبت فيه هذه الفكرة و انو قديش لازم أنظر للأمور بحياد بدون ما أختلق أفكار متسرعة عن الجزء البسيط اللي بأشوفه من حياة الناس فيها.
    شكرًا لطيفة، أحبك 💔
    الله ييسر عليكم و يرزقكم الرضا و الهنا، و يبارك لكم بالجاي من حياتكم. ❤❤

    إعجاب

    1. فعلاً قد ما حاولتي تشاركي الحقيقة على السوشال ميديا بتبقى الصور أحلى وحالمة أكتر ✨
      بكل الأحوال لما أنا بصور زاوية من حياتنا وبتطلع الصورة حلوة بانتبه انو يمكن فعلا حياتنا حلوة بس نحن مو منتبهين 🤔🤔 عرفتي كيف؟؟ يعني يمكن بالحالة يلي ذكرتيها : العكس صحيح 🤔

      Liked by 1 person

  4. + أحس يوم بعد يوم بكون احترام و تقدير لكِ على حاجات مختلفة.
    الحمد لله إني عرفت مدونتك و اكاونتك بانستقرام، و الحمد لله إنك جزء من تجربتي مع الحياة. 🙌🏻❤❤

    إعجاب

  5. يالله قديش الواحد ما بيقدر يتخيل ظروف الناس!!!
    الحمدلله على وصولكم وشكرا لانك شاركتينا هالذكريات
    .
    .
    .
    لما شفت الستوري بالانستا توقعت يكون البلوق عن اللجوء نفسه، انت تطرقتِ له رؤوس اقلام وحتى الصور ما علقت عليها
    اعذري فضولي بس فعليا ما اعرف عن اللجوء غير اللي يهربون من كوريا الشماليه للجنوبيه ويضلون متخبين وشايفه بصورة فوق جالسين ع كراسي واغراضكم حولكم طيب انت معاكم جوازات دوله يعني ما يصير كانكم دخلين للدوله بحق شرعي وعادي تسكنون وكذا زي الي بيسافر سياحه؟

    إعجاب

    1. ههههه لا للاسف حامل الجواز السوري دخولو واقامتو بكل دول العالم شبه مستحيلة 💔💔💔 مرينا بكل الدول بشكل غير شرعي حتى وصلنا ولألمانيا وطلبنا حق اللجوء 💔
      بالأجزاء الجاية رح تكون باقي تفاصيل الرحلة ان شاء الله ✨

      إعجاب

  6. أنا مابحبك….. بكيتيني كتير و لكن شكراً ع شي واحد انك خليتيني حسّ بمشاعر حب ماعادت موجودة الا بناس قليلين هنن هلأ بعاد عني كتير و لوهلة اياماً بحس اني محاطة بناس بلا احساس متل الالات و خاصة بعد ماتركت سوريا
    هالايام صرت عم اهرب من الواقع بالقراءة لانو ماعم لاقي صديق قريب الجئلوا و ارتحلوا و يفهم عليي و غالباً انا وحيدة جداً لكن الحمدلله الله معنا و الكتب الحلوة ..
    بتعرفي الناس اللي بقولوا عندن مشاعر حب فائضة مابيعرفوا وين يروحوا فيها انتو قصتكن هيك بس بدون ماتحسوا
    صديقتي ليلي ” اذا بتسمحيلي” الله يحميكن و يديم المحبة و يمحي كل هالذكريات و يعوض صبركن أجمل مما تمننون انتو و عم تشوفوا سلمى عم تكبر قدامكن بأعلى المراتب

    إعجاب

    1. حياتي رنا 💔💔💔 شكراً كتير على هالكلمات والله يبعتلك كلشي حلو بتتمنيه ويسعدك الى اللانهائية ومابعدها 🙌🏻

      إعجاب

  7. الله يخليكم لبعض💛 احب طريقتك في الكتابه وتسلسل الاحداث فيها مبدعه مثل ماعهدناك شوقتيني انتظر الاجزاء الباقيه🤤 والله ينصركم يارب ويحرر سوريا ويجمع شملكم

    إعجاب

  8. الله يخليكم لبعض💛 احب طريقتك في الكتابه وتسلسل الاحداث فيها مبدعه مثل ماعهدناك شوقتيني انتظر الاجزاء الباقيه🤤 والله ينصركم يارب ويحرر سوريا ويجمع شملكم

    إعجاب

  9. رغم كل شي صعب عشتيه الخروج منه بحقيقة ان اختيارك كان صح و ان الكتف يلي اخترتي تساندك و تسانديها كان اكثر صورة للمثالية، الأمر رائع انك تشوفي الضوء في طريق مظلم خفت تخطي فيه من البداية، الأروع ان الضوء يكون مثمثل بشخص ❤️
    ربي يخليك لبعض ❤️
    -بس السؤال كيف أيقنتي ان سليم هو الاختيار الصحيح ؟

    إعجاب

  10. يا الله .. وتنا اللي بستنى هالقصه بفااارغ الصبر مانتبهت انك نشرتيها على مدونتك .. معناها انا صديقة سيئة 💔
    الرحلات والمعارك اللي خضتوها بتدل انكم اقوياء ومناسبين وبتكملو بعض ولبعض .. الله يحميكم لبعض ويسعدكم يارب وتكون هي اااخر المراحل السيئة في حياتكم ❤

    إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s