مطبوعات ٢٠١٨ للبوليت جورنال ☀️

كان المفروض يكون في فيديو على اليوتيوب احكي فيه عن هالمجموعة بالتفصيل مع تطبيقات وافكار لاستخدامها بس للاسف الايام كلها غائمة جداً وغير مناسبة للتصوير ☁️💔

ولأني حابة اعطيكم المطبوعات من هلأ حتى تلحقو تستخدموها قبل بداية العام لهيك رح حاول قدر الامكان اني اشرحها بشكل مفصل هون على المدونة 🌿

الهدف من هذه المطبوعات:

١. اختصار الوقت:

لأنو في بالبوليت جورنال أقسام وجداول جداً مهمة وبتسهل عملية التنظيم ولكن تحضيرها بياخد وقت كتير كبير وأنا كأُم ماعندي هاد الوقت والصبر 🤷🏻‍♀️ لهيك هادي المطبوعات رح يكون فيها بس الأقسام الصعبة والجداول يلي فيها أرقام وأيام وشهور.. حتى نختصر شوي من وقت التجهيز للتنظيم ✨

٢. الحفاظ على هوية صاحب المنظم:

ساويت المطبوعات جداً بسيطة وأساسية وباللون الأسود فقط حتى تكون جاهزة لاستقبال هوية وشخصية مستعمل المنظم، وبتقدرو ترسمو عليها او تستعملو الوان تانية وتضفو عليها طابعكم الخاص 🥀 وكمان لأنو أحلى شي بالبوليت جورنال هو انو ممكن نقسمو ونصممو على كيفنا ١٠٠٪؜ وأنا ماحبيت أني الغي هالميزة بسبب مطبوعاتي لهيك ماكنت ساوي صفحات للتنظيم اليومي او الاسبوعي أو قوائم من اي نوع!

٣. المطبوعات المستعملة 🙌🏻

لأني شفت كمية السحر بالكتب المستعملة لما منفتحها ومنشوف ملاحظات وإشارات مكتوبة بخط القارئ السابق! حبيت انقل هادي التجربة للتنظيم ✨ لهيك حطيت نسخ إضافية من المطبوعاتي عليها رسماتي وخربشاتي وتوقيعي حتى يكونو هالمطبوعات رابط خاص بيننا ❤️

img_5391

٤. المطبوعات للشعب العربي ☀️

هادي أول مرة بساوي فيها منظمي الخاص باللغة العربية (مو شرط اتقيد يعني رح اكتب فيها متل ما بحب عربي او الماني او انكليزي..) بس المهم هو الثيم والعناوين العريضة باللغة العربية 🙌🏻 ولهيك ساويت التقويم الميلادي بالنسختين:

السيريانية: كانون الثاني ، شباط، آذار.. الخ

المعرّبة: يناير ،فبراير، مارس… الخ

 

وهلأ وصلنا للجزء الحلو 🎊

قائمة المهام المتسامحة

هادي القائمة خاصة بالأمهات 😂💔 مكتوب عليها to do or not to do 🌚

وفيها مضاد لتأنيب الضمير عن كل المهام يلي رح تلغيها بسبب انو بنتك قررت انو لازم تتركي الدنيا وتلعبي معها 🤷🏻‍♀️

img_5387

img_5386-1

 

السجل المستقبلي

img_5398

هادي الصفحتين كل ٦ شهور سوا، ممكن تستعملو الـ ١٢ شهر دفعة وحدة ورا بعض مباشرة أو تحطو أول ٦ شهور وتكفو بالصفحات يلي بعدها تنظيم عادي.. وبس يجي وقت الـ ٦ شهور يلي بعد وقتها بتحطو السجل التاني، وهادي الطريقة عملية أكتر برأيي 🙌🏻

هاد السجل مخصص للمواعيد المهمة بالأشهر الـ ٦ الجاية، مثال:

أنا حالياً بالشهر الثاني/ شباط وعندي منظم شهري لشباط بس اتذكرت انو بآذار لازم اشتري هدية لأختي ريم يلي عيد ميلادها بـ ١ نيسان 😂😂

طبعاً مافيني حط هيك تذكير بالمنظم الخاص بشهر شباط!

وهون بتجي فائدة السجل المستقبلي: لأنو فيني وقتها ساوي إشارة على يوم ١ نيسان حتى ما انسى، واكتب بقسم شهر آذار اني بهاد الشهر لازم اشتري هدية… لما بيجي شهر آذار وبقرأ الملاحظة رح حدد وقتها الموعد بالضبط للشراء و رح احمد ربي انو لسا معي وقت حتى فكر بهدية لاختي ريم يلي كل يوم بتغير هواياتها 🌚

المنظم الشهري

رح تجي بملف pdf فيه الـ ١٢ شهر بالتقويمين السيرياني والمعرّب، و رح نستعمل ببداية كل شهر وحدة من هدول الـ ١٢ ورقة .. كل ورقة فيها صفحتين، وعليها أيام الشهر كاملة وقسم للملاحظات وقسم للإلهام.

img_5394

ملاحظة: بحال حسيتو التصميم مو كتير مناسب، بتقدرو تقصو اسم الشهر ومربعين الملاحظات والالهام وتلصقوها على صفحة بداية الشهر عندكم لأنو شكلها بيطلع كتير حلو وبعدين بتساوي منظم شهري على حسب ذوقكم 🙌🏻

ملاحظة تانية✌🏻:

بتقدور تستعملو مربع الالهام للصق صور او ملصقات او عبارات ملهمة او حتى ورق شجر واقمشة.. حيلا شيرح يكون مصدر الهام لانتاجكم خلال هاد الشهر ☀️

 

مراقب العادات

شخصياً 🌚 لا اظنني سأستخدمه أبداً لأنو بعرف أديش حياتي متقلبة ومتغيرة يومياً وماحابة شوف الحقيقة المرة على شكل مربعات ملونة 🤷🏻‍♀️ شكراً ✋🏻

بس لأني بعرف اهميته مراقبة عادات مهمة وتطورها والالتزام.. لذلك ساويتلكم جدول بسيط لمراقبة العادات

وبطاقات لتعريف المؤشرات يلي رح تستعملوها على الجدول.

img_5384

img_5383

ملاحظة: رح تشوفو ملف pdf فيه ١٢ جدول و١٢ بطاقة حتى تكفي لسنة كاملة، وبكل جدول في ١٠ سطور لـ ١٠ عادات وقابل للتعديل يعني ممكن تقصو السطور يلي مابدكم ياها ببساطة من الجدول ومن البطاقة ✨

وأخيراً جزئي المفضل! الصفحات المستعملة

مبدئياً رسمت على أول صفحة من السجل المستقبلي (بالنسختين) و على صفحة الشهر الأول (كانون الثاني ويناير) و رح يكون في تحديث شهري ان شاء الله ❤️

أنا طبعتها على ورق شفاف حتى مايتغير لون صفحات الدفتر وكان لأني بحب المربعات أكتر من الكتابة على مساحة بيضاء فارغة 

img_5392img_5396img_5388img_5391img_5393

 

الملفات كلها مجانية وبصيغة pdf حتى تقدرو تفتحوها من حيلا جهاز ببساطة وتطبعوها ❤️❤️

بس اضغطو على اسم الملف المكتوب بالأزرق تحت حتى تاخدو الملفات ⇓

 

قائمة المهام المتسامحة

السجل المستقبلي المعرَّب

السجل المستقبلي السيرياني

منظم شهري معرَّب

المنظم الشهري السيرياني

مراقب العادات

صفحات المنظم المعرب المستعملة

صفحات المنظم السيرياني المستعملة

 

وبتمنالكم عام سعيد ومثمر 🌿

Advertisements

2 thoughts on “مطبوعات ٢٠١٨ للبوليت جورنال ☀️

  1. ما احلاكي و ما احلى التفاصيل والحب اللي في كل مطبوعة 💚 يعتيكي العافية و انا شخصيا جدا حسيت الاشي مفيد و زي ما قلتي خاصة الأماهات يادوب يلاقوا وقت يفتحوا البلانر المساء يكتبوا ايش المهم لبكرا او الاسبوع الجاي .. ما في وقت كافي حتى لسه تجهز الlayout ف جد الاشي اللي عملتي رائع سلم ايدك و انا راح استخدم منهم كم اشي 🙈🙌

    Liked by 1 person

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s