أشيائي المفضلة في شهر أوكتوبر 🍁

أنا -وبشكل رسمي- اعتبرت أنو الخريف انتهى 😂💔

من يومين كانت درجة الحرارة -٢ بالليل وهاد دليل كافي بالنسبة إلي على نهاية الخريف 🤷🏻‍♀️

ولأنو شهر أوكتوبر هو دائماً شهري المفضل بالسنة رح شارك معكم وبعد طول انقطاع مفضلاتي للشهر الماضي 🍁🌚

سليم:

صديقي سليم من مواليد شهر أوكتوبر ❤️

احتفلنا بيوم ميلاد سليم أول مرة لما كنا مخطوبين بسوريا، وتاني مرة كانت لما ارجعنا التقينا بعد غياب طويل لمدة سنتين وكنا بالمخيم يلي قدمنا لجوئنا فيه بألمانيا 💔

والمرة الثالثة كنت حامل بالشهر التاسع ✨ وهالسنة كانت رابع مرة منحتفل سوا بيوم ميلاد سليم بس كنا اتحولنا من شخصين الى ٣ أشخاص 🌟 الحمدلله

بكل أوكتوبر عم يكون وضعنا مختلف جذرياً 🙌🏻 وكانت فرحة هالسنة هي الاكبر على الاطلاق!

img_4069

 

 

أعواد الند :

ببداية شهر اوكتوبر كان في سوق خردوات بالمدينة الصغيرة يلي ساكنة فيها وهنيك شفت طاولة عليها أنواع كتــيــرة من البخور واعواد الند 💔 أخدت برائحة الياسمين و وحدة تانيه برائحة ورق الغار 🙌🏻

أكيد الياسمين كانت هي المفضلة عندي ✨ بس بعدين بآخر اوكتوبر اجت الماما من جدة ❤️ وكانت جايبتلي معها اعواد ند برائحة العنبر 💔

هون كان السحر الحقيق 🌟

رااائعة ودافية وحلوة وساحرة وفيها روحانية بدرجة عالية ✨

ويمكن تبقا هي المفضلة عندي لشهور الجاية كمان 🙌🏻

 

 

هاروكي موراكامي:

وبكل تأنيب ضمير حبيت روايات الكاتب الياباني هاروكي موراكامي 💔

قرأت كافكا على الشاطئ والكتابين الأول والثاني من 1q84 🌕🌖

وبالرغم من كل اعجابي بروايات دان براون وأحمد مراد حسيت انو هالروايات اليابانية من عالم تاني!

كتير آسرة 💔

حبيت وصف اسرار النفس البشرية بكتاباتو وحبيت التشويق بالقصص وحبيت الاختلاف الشاسع بين عاداتنا وشكل حياتنا وبين عادات وشكل حياة الشعب الياباني ❤️

وحبيت المشاعر الخارقة والقوية واستخدام الكلمات بذكاء ❤️

وبكل شوق عم انتظر ترجمة الكتاب الثالث من 1q84 يلي لحد الآن كانت احلى رواية قرأتها على الاطلاق وفيها رحلة عميقة كتير لاكتشاف الذات ✨

 

 

حاجز المطبخ:

بيتنا العزيز والصغير جدا مافيه باب للمطبخ! 😂

أكتر غرفة بتحتاج لباب بوجود بنوتة عمرها سنة -تقريباً- ومافيها باب ! 💁🏻

لهالسبب كنت عم استعين بالسرير يلي خليتها تدرب فيه على المشي لفترة مؤقتة خلال اليوم وبعدين لما صارت مشيتها شبه مكتملة كنت مضطرة اني اعطيها مجال اوسع تتحرك فيه وتستكشف براحتها 💔

طلبت الحاجز الصغير من موقع mytoys ووصلني مباشرة بعد يومين 🙌🏻

كانت فتحة الباب أوسع من حجم الحاجز بكم سم لهيك اشتريت لسا وصلة حتى تعطيه عرض اكبر 🙌🏻 كان تركيبو شوي مربك بس بمساعدة سليم مشي الحال 🌟

الحلو فيه أنو ما بدو براغي أو أي حفر بالحيط 👌🏻 مثالي لبيت قديم ومهرهر بالايجار صاحبتو ختيارة حريصة بشكل مبالغ فيه ومابتحب حدا يخربلا الحيطان الاثرية 😂😂🤦🏻‍♀️

ومن بعدها لما سلمى صارت تتحرك براحتها صارت الأعدة معها كتير ممتعة ومريحة 😭💔💔

هاد الرابط إذا حبيتو تشوفوه بالموقع 👇🏻

https://www.mytoys.de/reer-klemmgitter-4531991.html

 

مرسى زمان:

صديقاتي على الانستغرام اكيد سمعتو اغنية مرسى زملن لـ لينا شاماميان ألف تالاف مرة بالستوري تعيتي هالشهر 😂💔

مارح اوصف هالاغنية أبداً بس رح اعطيكم الكلمات والرابط حتى تسمعوها وبعدين بسمحلكم تنضمو لقائمة المسحورين بهالاغنية 😌🙌🏻

“كان فيه مرسى زمان، للموجة عشقان : والجزر بهواهن يلغي المد ال كان

و كانوا صخورو سياجو وكان القمح بلاد، و الخبز عباب صحابو و أغانيهن فرح و زاد

وفاقت بالمرسى الريح وفيقت إعصار، وبحارة المراكب ضيّعوا المسار

وعشق الموجة تحوّل للمرسى جلّاد، وغرقت السّنابل و هواهن صار رماد

والأرض : سال دمعا مي ، تفرّقوا صحابا … والعَجَم بأغانيهم صار صَبَا عتابا

راحوا البحر وقالوا خَيْ، الحْرق بتطفيه مَيْ، قسي البرّ علينا :

بتحمل وجعنا شوَيْ ، ومنحمل منَّك كّيْ؟

برِّد جرحنا … خطَيْ و منحمل ملحَك كَيْ

تاري البحر غلّاب … و عطشانة المَيْ …ولولا دموع الغَلابة ما شاف اللولو الضَّي

وأهل المرسى صاروا غراب ، و ودّولوا عتاب : بحرك قسي علينا، حنّ علينا شوي

الدّنيا داقت فينا … وحدا السّما رحمة و فيْ.”

رابط الاغنية على youtube 👇🏻

https://www.youtube.com/watch?v=8EdJiWm6hrg

 

ألبومات الصور:

كانت الماما دائماً تحتفظ بالصور (الحقيقية المطبوعة ومو الصور الديجيتال يلي كلنا عم نعتمد عليها بشكل أساسي حالياً 😅) وبعدين أنا استلمت مهمة حفظ الذكريات عن الماما 💔

كانت دائماً تطلب مني احتفظ بشهاداتي المدرسية وكل الأشياء والصور يلي فيها ذكريات حلوة حتى فرجيها “لاولادي” 😂😂

وأنا كتير ممتنة لهالنصيحة! ❤️

عندي كمية هاااائلة من الصور على لابتوبي من سنة الـ٢٠٠٨ ولحد الآن

و٩٩٪؜ منها من تصويري يعني كنت أنا حاضرة بكل هالصور وبس شوفها برجع بتذكر هداك الوئت بكل تفاصيلو 💔💔

من كم يوم رجعت رتبت الصور القديمة المطبوعة بألبوم هداني ياه سليم بيوم ميلادي الماضي ❤️

وحسيت اني حابة ارجع اطبع كل الصور الي بحبها من لابتوبي – يلي عددها أكيد أكتر من ١٠٠٠ صورة 😂- بس مبدئياً رح بلش ان شاء الله بألبوم صور السنة الأولى من حياة سلمى ❤️ بما انو يوم ميلادها رح يكون بـ ٤ نوفمبر 🌟

 

شو كانت مفضلاتكم لشهر أوكتوبر؟؟

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s