شوربة اليقطين 🎃

وأخيراً شهر أوكتوبر ✨

على فكرة من السنة الماضية وأنا آخدة هالصور يلي رح تشوفوها بالبوست وكنت بدي شاركها معكم بس يمكن بوئتها كانت نهاية الشتوية وحسيت الموسم أبداً مو مناسب 😂

اليقطين / القرع 🎃

أنا كتير بحب شكلو وبحب مربى اليقطين بس كأنو بسوريا مافي عنا أكلات كتير مشهورة فيه 🤷🏻‍♀️ أو يمكن في بس أنا مابعرف غير المربى 🤔

المهم أنو جارتنا ختيارة ألمانية مرة عزمتنا عليها وكانت الشوربة بالأول لحال مع الخبز المحمص وبعدين حطتلنا الوجبة الرئيسية 💔 وحبيناها أنا وسليم جداً وصرنا نساوي الشوربة لحالها كوجبة رئيسية 😂

أخدت الوصفة منها ومن جارة المانية تانية كمان وشفت عاليوتيوب يمكن شي ٥ طرق تانيين وكانت كل طريقة مختلفة تماماً عن التانية 😅

حتى أنا بساويها بطريقة معينة وأختي فاطمة بتطبخها بوصفة مختلفة تماماً 😂💔

المكون الرئيسي بكل الوصفات هو اليقطينة طبعاً 😅

وبعدين في الخيارات التالية:

مع جزر وكرفس ومرقة خضار

مع جزر وبطاطا وبصل

مع بطاطا حلوة وبصل

وممكن مع مرقة (لحم – دجاج – خضار) أو بمي عادية 😅

وعنجد بكل الأشكال طــيــبة كتير وبتعطي جو كتير حلو بالخريف ✨

أنا كنت ساويها ببصل وبطاطا عادية وبضيف الجزر مشان يعطي حلاوة ولون برتقالي واضح، بعدين شفت أنو البطاطا الحلوة بتجمع بين الجزر والبطاطا العادية من ناحية القوام واللون والحلاوة 😅 لهيك بلشت استعملها 👌🏻

الطريقة يلي اليوم ساويتها وشفتوها على ستوري الانستاغرام:

المكونات:

نصف يقطينة Hokkaido تقريباً ٧٥٠غ

حبة بطاطا حلوة وسط تقريباً ٣٠٠غ

بصلة صغيرة

ورق غار

ملعقتين زيت نباتي

وتقريباً كوب ونصف ماء 👩🏻‍🍳

الطريقة:

بالبداية بشغل الفرن على درجة حرارة ٢٥٠ درجة مئوية من فوق وتحت، وبهالوقت بغسل اليقطينة منيح وباخد النصف وبشيل اللب والبذور وبقطعها مع القشرة مكعبات حجم وسط، وبقشر البطاطا الحلوة وكمان بقطعها مكعبات وسط وبحطها مع اليقطين بصينية فيها ورق زبدة وبخلطهم مع ملعقة زيت نباتي وبدخلهم الفرن تقريباً ٢٠ د أو حتى شوف القطع بلشت تحمر.

هالخطوة بتخلي اليقطين والبطاطا الحلوة تصير طعمتهم أحلى ويصير بالشوربة نكهة قوية مو متل لما بتكون عبارة عن خضار مسلوقة وبس.

ولبين ما يجهز اليقطين والبطاطا الحلوة بالفرن بكون قطعت البصلة ناعمة وبطنجرة على نار متوسطة بحط ملعقة زيت نباتي وبشهي البصلة لتبلش تحمر وبضيف المي وورق الغار واليقطين والبطاطا يلي كانو بالفرن، (بس بالأول بشيل القشر عن اليقطين) وبغطي الطنجرة وبتركها على نار متوسطة-هادية لمدة ٢٠ د مو أكتر لأنو أساساً بكون اليقطين والبطاطا الحلوة مستويين من الشوي مسبقاً ✨

ومتل ما شفتو مابحط لا ملح ولا فلفل ولا بهارات وولا شي بالمرة! بس ورق الغار وبتطلع طعمتها بتجنن 🙌🏻

لبين ما تستوي الشوربة بكون قطعت ٣ قطع توست مكعبات صغيرة وبحطها بمقلاية على نار قوية مع ملعقة زبدة ورشة كبيرة ملح وممكن شوية بقدونس مجفف 🙌🏻 بحمصهم سوا حتى يصير التوست مقرمش ودهبي ✨

وبس تخلص الشوربة بستعمل الخلاط اليدوي أو ممكن تحطوها بالخلاط العادي إذا كانت زجاجي وبيتحمل حرارة عالية 👌🏻

وبطحنها كتير منيح حتى يصير القوام كريمي وهون بتقدرو تحددو إذا حابين تكون سائلة أكتر ممكن تضيفولها شوية مي مغلية حتى توصلو للقوام يلي بتحبوه 🙌🏻

وللتقديم بس بتسكبوها بصحن الشوربة وعلى الوش بتحطو معلقتين كبار من الخبز المحمص 😭💔 وممكن تحطو رشة صغيرة كريما طازجة بس ماشفتلها طعمة بالمرة هي بس شكلا حلو 😂😂

وبالنسبة لنوع اليقطين ممكن تختارو النوع المتوفر بس أنا بحب الـ Hokkaido أكتر شي لأنو حجمها صغير ونحن منساويها لشخصين فأكيد ماحابة جيب كمية كبيرة وتنكب عندي 😅 وكمان لأنو لونها كتير حلو وطعمتها حلوة🎃

وخريف سعيد لكم يا أصدقائي 🍂

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s