الخريف وجوارب الصوف 🍂

من بداية شهر أيلول/سبتمبر بلشت وراق الشجر تنزل بشكل سحري 🍂✨

وما بقدر اوصف فرحتي أبداً أبداً، بس رح جرب 🤷🏻‍♀️

بحس تماماً كأنو قلبي صار كتـــيــر كبير وفي جواه نجوم والكثير من مربى البرتقال والقرنفل والقرفة 💔

وبخريف السنة الماضية كنت حامل بسلمى بالشهر التامن وحاولت كتير اني اتعلم ساوي جرابات صوف، وقضيت سنة كاملة من المحاولات الفاشلة 😂💔

بس هالسنة لقيت الطريقة المثالية ورح شاركها معكم ❤️


بألمانيا شفت الناس بتلبس دائماً جرابات صوف تحت الأحذية بالشتاء لأنو هي الوحيدة يلي ممكن تدفي بهالبرد ❣️

وبتكون مصنوعة يدوياً من صوف رفيع يعني كتير عملية ومريحة 🙌🏻 جربتها وحبيت الفكرة كتير

الجرابات الصوف ممكن تنعمل بسنارة دائرية أو بـ ٤ سنانير مدببة الطرفين 💁🏻 انا بساويها بالطريقة الثانية وكتير بسيطة على فكرة تماماً متل الشغل بسنارتين عاديتين 🤷🏻‍♀️ مافيها أي شي مختلف غير أنو منشتغل دائماً على نفس الوجه ومامنضطر نشتغل الوجهين!

وفي أكتر من استراتيجية لشغل الجرابات أشهرها (النوع يلي بيبدأ من الأصابع وبيكفي الشغل للكاحل واسما بالانكليزي tow up socks, والنوع التاني منبدأ فيها من عند الساق والكاحل وبينتهي عند الأصابع واسمها cuff down socks) وأنا جربت الطريقة الأولى بالبداية ، كانت أسهل بكتير من الطريقة التانية والحلو فيها هو التحكم بكمية الصوف يعني بعد ما نخلص من منطقة الأصابع والكاحل ممكن نساوي طول الساق بكل الصوف الباثي وهيك ما بيبقا صوف زائد كالعادة 😂 بس حسيتها ما كتير عملية من جهة الكعب ومو مناسبة للاستعمال اليومي وكمان لما بدنا ننهي منطقة الساق مزعجة باختيار طريقة ختم الشغل 🤷🏻‍♀️ يا بتكون واسعة كتير وبصير الجراب بيزحط بسهولة أو بتكون مشدودة كتير وبصير لبس الجراب صعب 🤦🏻‍♀️ لهيك بلشت دور على فيديوهات يوتيوب بتشرح الطريقة التانية (cuff down socks (

أنا بالعادة بحضر فيديوهات بالانكليزي او الالماني لما بدي اتعلم شي بخص الصوف أو الكروشيه لأني بحس عندهم معلومات شاملة أكتر 🤷🏻‍♀️ بس بهالموضوع تحديداً كانت أغلب الفيديوهات ناقصة بسبب أنها بتنباع على شكل كورسات تعليمية وما بتكون موجودة كاملة على اليوتيوب 💔

خطرلي لأول مرة ابحث عن في فيديو عربي ولقيت ضالتي وأخيراً 😭😭💔

في بنت مصرية كتير حبابة وشرحها بجنن 🙌🏻 مشيت معها خطوة خطوة بكل بساطة وكانت نتيجة مثالية!!!!

هاد رابط الفيديو يلي اتعلمت منو 👇🏻

bluesky channel

وعلى فكرة حتى لو معلوماتكم كتير بسيطة عن الصوف نصيحة جربو معها أكيد أكيد رح تمشو معها ببساطة وتعرفو تساوو جرابات حلوين ❤️

وإذا كنتو ما بتعرفو ولا شي بالمرة بظن عندها فيديوهات تعليمية من الصفر للمبتدئين 🙌🏻

أنا ساويت جراباتي السنة الماضية بالطريقة القديمة وهالسنة ساويت لسلمى من نفس الخيط جرابات بس بالطريقة الجديدة وكتير كانو حلوين 😭💔

حسيت السنانير بحجم ٢،٧٥ مثاليين للجرابات الصوفية يلي بتنلبس تحت الأحذية وبظن بيلزم كرة صوف١٠٠غ أو كرتين ٥٠غ حتى يكفي للفردتين.

وملاحظة تانية بالفيديو رح تشوفو أنو هي بتترك بالسنارتين آخر شي يمكن شي ١٠ قطب أو اكتر وبتختم فيها جهة الأصابع، بينما أنا بترك بس ٤ قطب بكل سنارة وبختم فيها لأني شفت هيك بساووها بالطريقة الألمانية وحسيتها أريح باللبس ❤️

جربوها كتير فيها متعة اذا بتساووها للأطفال لأنو بتخلص بسرعة وكتير حلوة تنعمل كهدية ببداية الشتاء ✨

إذا عندكم أي اسئلة او اقتراحات اكتبوهات تحت بالتعليقات ❤️

وبتمنالكم خريف سعيد ومثمر 🍂✨

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s