weaning journey with Salma | رحلة التعرف على الطعام مع سلمى

البوست يلي كتير انطلب مني بآخر 3 شهور بس للأسف ماكان عندي وئت اكتبو 💔

بهالبوست رح احكي تجربتي مع أكل سلمى بالتفصيل، مع كل النصائح والمعلومات والخطوات يلي ممكن تساعدكم لتجربة ناجحة ان شاء الله 💖


بالبداية لازم احكي أنو الكلام يلي رح تشوفوه هون هو مبني على تجربتي الشخصية بالاستعانة بكتب ومقالات من أخصائيين تغذية للأطفال وبمساعدة القابلة الي كانت مسؤولة عن حالة سلمى الصحية من لما ولدت، وأنو كل طفل هو حالة منفردة ومميزة، يعني مستحيل كل الأطفال يحبو نفس الأكلات أو يكرهوها! لهيك أنا رح شارك معكم القواعد يلي اذا استخدمناها صح منقدر نعرف كل طفل شو بحب وكيف نقنعو يجرب يلي ما بحبو 💓

العمر المناسب للبداية بتقديم الأكل للرضع:

بتختلف الفترة بين 4 شهور لعمر الـ 6 شهور.

الطريقة الوحيدة لمعرفة هالموضوع هي مراقبة طلبات الأطفال. لأنو عادة بكون الحليب كافي تماماً لعمر الـ 6 شهور، بس بحالات تانية ممكن الأطفال يبلشو يطلبو شي إضافي مع الحليب حتى يشبعو.

سلمى من لما خلئت ما كانت صبورة على الرضاعة أبداً! مع أني صبرت معها كتير وماعطيتها حليب صناعي أو أي شي تاني وحتى لما حاول شربها الشمرة أو البابونج المغلي كانت حتى ما تحب تشرب من القنينة كمان!

ولما لاحظت عليها أنو ماعم تشبع استعنت بالقابلة وخبرتني وقتها أنو سلمى عم تعطيني اشارات انو هي جاهزة تاخد أكل بالإضة للرضاعة، وكانت وقتها ببداية الشهر الرابع وفعلاً من لما جربت معها ابدت علامات حب كبيرة للملعقة 😂

البداية: 

أنا استعنت بشكل رئيسي على شغلتين:

1- حدس الأم ، والتجربة والمراقبة مع سلمى، يعني كنت بكل خطوة حاول اكتشف أكتر شو يلي بناسبها وشو يلي لسا بكير نساويه.. الخ

web 3

2- كتاب Ella’s kitchen: the first foods book (the purple one)

أنا عرفت عن هاد الكتاب بشكل سريع بالبوست الماضي ↶ 

مفضلات شهر شباط | February favorites

والطريقة يلي اتبعتها مع سلمى حسيتها كتير كتير ناجحة بشكل مفاجأ! الخطة الموجودة بالكتاب هي بتبلش بأسبوعين تمهيديين.

يعني نفرغ أسبوعين كاملين قبل البداية باطعام الرضع، بس لنعرفهم على النكهات المختلفة.

رح يكون كل يوم الغذاء الرئيسي هو الحليب كالعادة بس خلال اليوم وبفترة بكون الطفل ماكتير جوعان لدرجة كبيرة ويكون رايئ (حتى تصير تجربة مثيرة للاهتمام بالنسبة الهم) منصير منأدم للطفل نوع واحد من الخضار أو الفاكهة المطبوخة وبكمية كتير صغيرة.

يعني هون الأكل بكون بس لتجريب النكهات مو للشبع!

هاد الشي بساعد كتير أنو نخلي لسان الطفل يتعود على كل النكهات ومايكون صعب بس يكبر بموضوع الأكل.

وبعد هالأسبوعين منبلش نأدم وجبات أكبر تدريجياً وفيها مكونات أكتر ووقتها بتصير تجربة عنجد ممتعة للأم والطفل 💕

تحذيرات مهمة قبل البدأ بالاطعام:

لازم يكون عنا فكرة لتاريخ الحساسيات بالعائلة وهاد شي كتير مهم حتى نراقب الطفل مع كل أكلة جديدة إذا ظهرت عليه علامات الحساسية حتى نستشير الطبيب.

بعض الأنواع يلي ممكن تسبب الحساسية:

الحبوب يلي فيها الغلوتين متل القمح 

البيض

السمك

المكسرات متل الفول السوداني

فول الصويا

حليب البقر ومشتقاته

السمسم

بحال صار حساسية عند الأطفال رح يبين أعراض واضحة مباشرة لازم ننتبه عليها:

طفح جلدي أو احمرار وخصوصاً بالوجه

انتفاخ وتورم بالشفاه والفم

عيون دامعة وسيلان الأنف

ألم في المعدة متصاحب مع اقياء واسهال

صعوبات بالتنفس 

كتير ضروري مراعاة هادي الأسباب والأعراض لتجربة صحية مع الأطفال 💓

الأسبوعين التمهيديين:

حطيت بجدول صغير 14 نوع خضار وفواكه مختلفة حتى تجربوها مع أطفالكم وممكن تبدلوها بحيلا شي بناسبكم ومتوفر ببلدكم أهم شي التنوع بهالأسبوعين حتى نخلي الطفل يجرب أكبر كمية نكهات ممكنة ويصير منفتح أكتر مستقبلاً على كل النكهات الجديدة.

weaning 1.jpg

بالنسبة لميمي كانت النكهات المفضلة: الموز، الأفوكادو، البروكلي، التفاح، الجزر الأبيض، الإجاص، البطاطا، والرز

ومع الجزر تحديداً ما كانت تبدي علامات اعجاب بس كانت تاكل الكمية كاملة بكل الأحوال

نصيحة مهمة: مو شرط إذا أبدا الطفل انزعاج من نكهة معينة لأول مرة معناها مستحيل يرضى ياكلها! مثلاً سلمى أول مرة أكلت الأفوكادو كتير حبتو بس تاني مرة قدمتلا ياه بارد وهاد الشي زعجها! بس بعد فترة كل ما اعطيها الأفوكادو دافي تاكلو بشهية!

كمان بالنسبة للبطاطا الحلوة أول مرة عطيتا ياها ما حبتها أبداً بسبب قوامها وأنو فيها ألياف كتير بس بعد شهر لما خلطت البطاطا الحلوة مع خضار تانية أكلتها عادي.

حتى إني قرأت بالكتاب الأخصائيين بقولو أحياناً لازم نجرب مع الطفل 10 مرات حتى يستسيغ النكهة 😅 بئا مافي داعي للاستسلام والاحباط 💕

طريقة تحضير الطعام:

بالبداية رح نقدم أغلب الأنواع مطبوخة ما عدا الموز والأفوكادو والمانغو.

ولازم ضروري نشيل القشر قبل السلق وبحال كانت الخضار فيها ألياف متل الفاصوليا والبطاطا الحلوة أو متل قشر البازلاء فلازم نستعمل مصفاية حتى يصير قوام الأكل سهل وآمن على الطفل.

بعد ما نسلق الخضار منضيف عليها ملعقة صغيرة مي مغلية أو ممكن استبداله بحليب الأم أو أي نوع حليب عم تستعملوه للرضاعة، حتى يصير المزيج أطرى. ومنستعمل خلاط أو خفاقة يدوية حتى نوصل لقوام شبه سائل بحيث لما نميل الملعقة شوي لازم ينزل الأكل من الملعقة من دون ما نضطر نهزها.

234

ممكن نضيف لأكل الأطفال ملعقة صغيرة من زيت الكنولا لأنو الزيوت بيساعد بامتصاص الفيتامنات أكتر.

خطوات مساعدة:

من بين الشغلات يلي خلت تجربة الأكل مع سلمى تكون سلسة:

1- الملاعق الملونة: كتير صارت الملاعق الملونة تلفت انتباهها وتخلي تجربة الأكل ممتعة، حتى اني احياناً لما كانت تعذبني شوي بالرضاعة صير استعمل الملاعق لشربها الحليب 😂

2- الأكل الدافي: ماكنت متوقعة أنو حرارة الأكل مهمة عند سلمى لهالدرجة! بس فعلياً كنت كل ما اعطيها أكل دافي تاكلو بشهية أكتر من انو يكون بارد!

3- اختيار الوقت المناسب: دائماً سلمى بتصير صعبة باكلها اذا كانت نعسانة، وبروح صبرها تماماً لهيك وئت كنت عم عرفها على الخضار كنت اختار وقت بالنهار تكون نشيطة فيه حتى تتفاعل معي بشكل اكبر.

4- تبادل الأحاديث: كنت لاحظ على حالي بسبب اني كون كتير مشغولة بردات فعل سلمى على النكهات الجديدة وفكر انو ياترى حبتها ولا لا! وبسبب هالتركيز كلو كنت انتبه على حالي فجأة أني عابسة وساكتة أنا وعم طعميها ! بعدين ارجع مرة تانية حكيها وغنيلها واتفاعل معها بوصف الأكل ولونو حتى  ماتكون تجربة مملة بالنسبة لئلنا سوا.

5- الشجاعة: كالعادة بحيلا شي بخص الطفل منحتاج للشجاعة، لأنو بسبب خوفنا ممكن نحرم أطفالنا من تجارب كتير حلوة ومفيدة بحياتهم! لهيك كنت عم حاول كل مرة استجمع قوايي وجهز لطبخات جديدة وعيد المحاولة مرة ومرتين وتلاتة قبل ما استسلم 💕

المرحلة الثانية:

وبعد الأسبوعين التمهيديين بلشت اعطي سلمى وجبات فيها مكونات أكتر، يلي متابعيني على الانستغرام أكيد شافو بالستوري جزء كبير من هالبوجبات 💖 

اذا بتحبو ممكن شارك معكم هادي الوصفات بعد فترة ان شاء الله💓

هادي تفاصيل تجربتي مع أكل سلمى 💕 إذا عندكم أي سؤال أو افتراح كالعادة اكتبولي تحت بالتعليقات

وشكراً كتير لدعمكم المستمر 💖

Advertisements

4 thoughts on “weaning journey with Salma | رحلة التعرف على الطعام مع سلمى

  1. كيفك ليلي 😍
    انا روان فحام 😊
    ماشاء للله شو هالبنت اللذيذة ..الله يحميا و يخليلكن ياها.. طالعة لأما يا أخي شو بدنا 😍
    انا بنتي صار عمرا 5 شهور ..بدي بلش طعميا …ما بقليلي كام خلطة لوجبات بعد اذنك ..ما عم لحق افتح لا نت ولا كتاب ولا شي 😂
    عندي دوام جامعة من الصبح للمسا كل يوم ..
    بكون ممنوونة كتيرررر

    إعجاب

  2. انا عم طعمي كوكي تقريبا نفس الشي بس بدي اسألك شو هاد زيت الكنولا و الافوكادو ليش مافينا نطبخو؟؟

    إعجاب

    1. زيت الكنولا بتشوفيه بالسوبر ماركت دائماً اسمو rapsöl والافوكادو مابيتاكل غير ني 😅 يعني متل الموز ❤

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s