baby sleep routine | روتين نوم الاطفال

🌜 Good night mama 🌛
 
بعد محاولات مستمرة على مدى شهرين من النوم المتقطع وتعب الأعصاب المصاحب للحياة مع مولود جديد، 
قدرنا وأخيراً أنا وصديقي (سليم) نفهم على المخلوق الصغير واللزيز والصعب (سلمى)، ونعرف الطريقة المثالية للحصول على روتين ثابت وسهل للنوم بدون بكاء وبدون تعب وبانتظام 💕 
 
تابعو معي حتى تعرفو الخطوات بالتفصيل 
 
 


 
 
من لما دخلنا أنا وسلمى على البيت سوا ( و الحمدلله ) بلشت رحلة الاكتشاف بيننا،
الحياة مع مولود جديد هي عبارة عن عملية تعلم مستمرة ويومية، 
أنا كان عندي معلومات بشكل عام عن تربية الأطفال، أما سليم كانت هادي تجربتو الأولى بالحياة مع طفل ببيت واحد!
رح شارك معكم المراحل يلي مرينا فيها حتى وصلنا لنتيجة مرضية والحمدلله 👌
 
وبآخر البوست رح أكتب أهم القواعد يلي لازم كل الأهالي ماينسوها أبداً حتى يقدرو يساوو روتين نوم ناجح. 💓
 
 
 
المرحلة الأولى : العجز
 
 
11.jpg
قرأت كتير بمقالات بتحكي عن روتين النوم للأطفال حديثي الولادة، وكل الآراء بتجتمع على أنو مستحيل يكتسب الرضيع عادات نوم ثابتة قبل عمر ال 6 أسابيع.. لأنو بهالفترة بكون نوم الرضيع متقطع وبفترات كتير قصيرة..
كانت سلمى تنام ساعتين كأقصى حد وبعدها تبقا ساعتين صاحية وترجع تنام ساعتين… وهيك على نفس المنوال كل اليوم.
 
بهادي المرحلة حسينا كتير بالعجز والتوتر بسبب قلة النوم، 
اضطرينا نتناوب أنا وسليم بالقيلولة الضهر حتى نقدر نسهر مع سلمى بالليل..
 
وبهاد الوئت كتـــيـــر مهم تعاون الأم والأب سوا والدعم النفسي لبعض،
 
بس كان في شي كتير مهم ساويناه بهادي المرحلة: 
 
قرأت بمقالة أنو مهم كتير ابتداءاَ من عمر الـ 3 أسابيع، تعريف الطفل على الفرق بين الليل والنهار..
 
لأنو غالباً الأطفال حديثي الولادة بيصحو بالليل وبنامو أكتر بالنهار، بسبب أنو لسا مابيعرفو يميزو بين الليل والنهار..
 
وفعلاً صرنا نخلي الجو كتير هادئ والاضاءة كتير ضعيفة بالبيت من بعد الساعة 8 المسا، وخلال النهار نخلي الشمس تدخل على البيت بكل الغرف ويكون في ضجة طبيعية لما تكون نايمة، منشان تتعود تصير نومتها خفيفة بالنهار وطويلة بالليل..
 
 
المرحلة الثانية: المحاولة
 
2.jpg
لما صار عمر سلمى 4 أسابيع كنا لسا منخليها تنام بتختنا، وما كنت نيمها بالسرير أبداً..
 
لسببٍ ما كنت اتخيل دائماً أنو لازم تكون قريبة مننا حتى تكون مرتاحة وماتبكي،
 لهيك كنت خليها بحضني دائماً أو بالكرسي الهزاز، 
 
فقررت أني جرب خليها تنام بالسرير، وفعلاً حاولت كم يوم أني لما شوفها نعست لبسها تياب النوم ونيمها بالسرير،
 بس كانت تبكي كتير..
 
بعدين حاولنا ننيمها بالكرسي الهزاز، ولما تغفا ناخدها على السرير، بس كمان كانت نتيجة فاشلة 
وصارت كل مانحطها بالسرير ترجع تصحا وتبكي!
 
هالشي طبعاً سببلنا إحباط كبير.
 
 
المرحلة الثالثة: الاستسلام
 
33.jpg
بعد مافشلت محاولتنا استسلمنا وصرنا ننيمها بحيلا طريقة المهم تغفا وبعدين نرجعها تنام بيناتنا بالتخت..
 
بس هالتقلب كلو ساوا نومتها لسا أصعب لدرجة أنو أحيانا عيد محاولة تنويمها 4 مرات وكل مرة تصحا مباشرة لما حطها جنبي بالتخت!
 
وقتها عرفت أنو في كم قاعدة أساسية لازم نراعيها حتى نساوي روتين نوم ناجح..
 
 
المرحلة الرابعة: النجاح
 
4.jpg
 
بهالمرحلة كان صار عمر سلمى 6 أسابيع، يعني صارت جاهزة تتلقى عادات نوم ثابتة،
 
وهادي هي القواعد يلي ساعدتنا على تحقيق هالشي:
 
1. الالتزام هو المفتاح الرئيسي لتعويد الطفل على أي شي، يعني لازم كل يوم بنفس الموعد تماماً أخد سلمى على السرير،
ولازم كل يوم بنفس المكان تنام حتى ما تتشوش ويصير التعود صعب عليها.
 
2. تجهيز أجواء تمهيدية قبل النوم يومياً، صرت كل يوم قبل موعد نوم سلمى بجهز جو غرفة النوم بإضاءة خافتة وبغير تيابها وبخليها تشبع تماماً بعدين لما بحطها بالسرير بشغل صوت (شلال) لأنو سلمى بترتاح على صوت المي ههههه وبلبسها كيس النوم وهيك بتكون عرفت مباشرة أنو هاد وقت النوم وبتبلش تدبل، وعيونها ينعسو 💕
 
3. حتى يتعود الطفل ينام بالسرير لحالو بدون مايبكي، لازم أبداً مانجيب الطفل على السرير وهو غفيان!
المفروض لما نحط الطفل بالسرير يكون لسا فايق بس نعسان كتير، وهيك بصير بيتعود يغفا لحالو وهاد شي كتير مهم خصوصاُ لما بفيق الطفل بنص الليل ليرضع، ويقتها بصير بيغفا لحالو مباشرة بعد الرضاعة بدون ما نحتاج نرجع نحطو بكرسي هزاز أو نمشي فيه حتى يغفا!
 
4. ضروري يتربط الطفل منيح كتير، لأنو سلمى كانت تفيق بنص نومتها بسبب حركة إيديها، 
ولما صرنا نربطها منيح بغطا رقيق، صارت تنام بعمق أكتر وفترات أطول بتوصل بين الـ3 ساعات للـ 6 ساعات أحياناً.
 
5. القيلولة خلال النهار بتخلي الطفل يستقر نفسياً ويكون جاهز لنوم هادئ بالليل.
6. أهم شي اتعلمناه أنا وسليم هو أنو الاطفال يومياً بحالات مختلفة، ومزاج مختلف..
يعني مو شرط كل يوم تنام بهدوء! ممكن تمر أيام تكون موجوعة بالليل وتبكي وبإيام تانية تغفى مباشرة بدون تعب!
المهم هو أنو ما نستسلم عن هاد الروتين حتى نوفر جو مستقر للطفل يساعدو ينام بسلام.💖
 
SAMSUNG CSC
 
هادي تجربتنا أنا وسليم 💕 أما القواعد الـ 6 يلي فوق، فهي نصائح قرأتها من مقالات لخبراء بتربية الأطفال وكانت نتيجتها معنا إيجابية تماماً، بتمنى تستفادو منها كمان.
 
أي نصائح أو اقتراحات أو اسئلة ياريت تكتبوها بالتعليقات تحت 💕 
وشاركو البوست مع كل الامهات يلي بتعرفوهم حتى يستفادو من هادي المعلومات ✌
 
 
وشكراً كتير لدعمكم المستمر 💖
 
 
 
 
 
 
Advertisements

3 thoughts on “baby sleep routine | روتين نوم الاطفال

  1. في نصيحة عم بسمعها كتير ، انه ما نخلي الولد ينام بنفس تخت الأم والأب ومن أول يوم نعوده ينام لوحده بكرسي هزاز او بتخت جنب سريرنا ، انه هيك أفضل ليتعود ينام بالتخت دغري ، شو رأيك بهالحكي ؟

    إعجاب

    1. اي أنا أؤيد تماماً موضوع النوم المنفصل لأكتر من سبب بس الأهم هو انو يتعلم الطفل “يغفى” بدون مساعدة! يعني بدون هز أو رضاعة أو حضن هو يغفي حالو بحالو 🙌🏻 هادي أكتر طريقة مريحة للاهل والطفل بنفس الوقت ❤️❤️

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s