my 2017 new planner | منظمي الجديد 2017

🌈 بعد غياب 4 شهور 🌈

 

كـل سنة وانتم بخير 💕 بعرف اني اتأخرت بمنظم السنة الجديدة 😀 
كنت عم جرب طريقة جديدة للتنظيم وحبيتها فقررت شاركها معكم 
تابعو معي الطريقة بالتفصيل 
 
 

 
 

Bullet journal

طبعاً هادي الفكرة مو من اختراعي 😀 صاحب الفكرة هو : Ryder Carroll
وهاد الموقع الرسمي 
 
 
وهون فيديو لتوضيح الفكرة على اليوتيوب  
 
 
وبهاد البوست رح احكي عن تجربتي مع هالطريقة بالتنظيم 
 
 
 
 
 
هالسنة عم استخدم مفكرة من LEUCHTTURM1917 بحجم A5 وهي النوعية المستخدمة غالباً بهادي الطريقة بالتنظيم بسبب ميزة الصفحات المرقمة، وهاد بخلي التنظيم أسهل بكتير..
 
ببداية المفكرة في الفهرس وهو يلي خلا تجربة التنظيم أحلى بكتير بالنسبة الي، من هاد الفهرس بقدر ارجع لكل الصفحات المتفرقة يلي بمفكرتي بسرعة 💓
 
 
 
بعد الفهرس حطيت أهدافي لسنة 2017 
 
 
 
وبالصفحتين يلي بعد حطيت قائمة امنياتي وقائمة الكتب الخاصة بهالسنة ↶ 
 
 
بجدول الكتب ساويت 4 أعمدة: اسم الكتاب، تاريخ البدء بالقراءة، تاريخ الانتهاء من الكتاب، وتقييمي للكتاب من \10
وبجدول قائمة امنياتي ساويت 3 أعمدة: اسم الشي يلي رح اشتريه، المتجر، والسعر.
 
وهيك بكون خلصت ال3 صفحات الأساسية بالدفتر ويلي مارح تكون متجددة ، وبعرف أنو ما رح يلزمني أكتر من صفحة لكل موضوع من هالواضيع..
 
 
بعدين حطيت مخطط للشهر كامل حتى سجل فيه الشغلات الرئيسية خلال الشهر 
 
 
وهادي الصفحة رح تسهل علي التنظيم اليومي أكتر.
 
جربت ساوي جدول للمنظم الاسبوعي بس ماحسيتو كتير مهم بالنسبة الي وبكفيني منظم شهري ويومي.
 
بالنسبة للمنظم اليومي، كل يوم بالليل بكتب تاريخ اليوم يلي بعدو وبحط فيه كلشي بخص اليوم الجاية من مواعيد وملاحظات ومهام وتذكير… الخ
 
 
وهون بيجي الشي المميز كتير بالـ bullet journaling وهو استخدام الرموز قبل كل شي منكتبو، يعني بكون في رمز محدد للمهام ورمز محدد للمواعيد، أو للملاحظات… الخ 
وجنب الاشياء المهمة منحط اشارة ❉ حتى تكون واضحة للعين اكتر 
وبنهاية اليوم أو بنهاية الاسبوع بساوي جرد لكلشي مكتوب، وبشطب المهام يلي ساويتا،
 وبحط اشارة < جنب المهام يلي قررت أجلها لغير يوم. 
وهيك بصير لما بدي ساوي قائمة اليوم يلي بعد ممكن ارجع بسهولة للمهام يلي جنبها اشارة < وبشوف اذا بناسبني حطها بيومي الجاية.
 
بالصفحة يلي جنب المنظم اليومي حطيت قائمة وجبات الاسبوع وقائمة المشتريات الخاصة بهادي الوجبات تحديداً..
 
في صفحات تانية حطيتها بآخر المفكرة متل صفحة للافكار يلي رح اكتبها بالمدونة ومواعيدها، ومتل الاشياء يلي لازم اشتريها من مكان محدد، حتى بس روح على هاد المكان يكون كلشي جاهز بقائمة مسبقاً..
 
 
 
 
أنا لسا عم جرب شو الطريقة المناسبة أكتر لإلي وشو القوائم المهمة وشوفي تعديلات ممكن ساويها لتسهل علي التنظيم أكتر.
 
 
والحلو بهادي الطريقة بالتنظم:
 
1. إنو النظام كتير مرن وممكن كل شخص يضفي عليه طابعو الخاص والتصنيفات يلي بتهمو.
2. هاد المنظم سهل كتير ومو بحاجة لطابعة أو كومبيوتر ولا بحاجة لتجديد الورق كل شهر.. الخ
3. أي نوع من أنواع الدفاتر وأي حجم بيمشي مع هادي الطريقة (المهم هو ترقيم الصفحات حتى يصير استخدامها أسهل مع الفهرس).
4. الطريقة أبداً أبـــداً مو مكلفة، على عكس المنظمات العادية يلي بكون سعرها غالي وبحاجة لتجديد الورق كل فترة.
 
 
 
طبعاً أنا ما التزمت حرفياً بالطريقة المذكورة بالموقع الرسمي، ولسا في كتير تعديلات حابة ساويها على اسلوبي بالتنظيم حتى اوصل لمرحلة مرضية بالنسبة إلي.
 
وعلى الأغلب كل فترة رح ارجع اعطيكم معلومات عن الطرق يلي غيرتها وشو الاساليب الجديدة يلي عم استعملها .. الخ
 
لهاد السبب أنا على الأغلب مارح ساوي منظم مطبوع هادي السنة، بس رح ساوي ملصقات للمنظم ان شاء الله 💕
 
أي أسئلة أو اقتراحات أو نصائح يا ريت تكتبوها تحت بالتعليقات 💓
 
وشكراً كتير لدعمكم المستمر 💖
Advertisements

3 thoughts on “my 2017 new planner | منظمي الجديد 2017

  1. هذا احسن شي بالبوليت جورنال انه فري و ممكن تعدلي عليها بأي طريقة
    انا بدأتها و عندي منظمين العادي و البوليت لانو احتاجهم سوا

    Liked by 1 person

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s