➄ easy ways for an organized week | طرق سهلة لأسبوع منظم ➄

◭ 5 خطوات يمكن تطبيقها خلال عطلة نهاية الأسبوع لتسهيل عملية التنظيم  

 
5 خطوات كتير سهلة رح تكون بداية أسبوع جديد منظم، هدول الخطوات يلي رح شاركا معكم رح نساويها بعطلة الأسبوع (جمعة وسبت أو سبت وأحد) وغالباً مارح تاخد وقت أو جهد أبداً!
 بس نتائجها كتير حلوة وكتير بتسهل علينا تنظيم الاسبوع الجاية ❤ 
 
 
 

 

 


 
1. المنظم الأسبوعي

 

weekly planner
 
 
 
التنظيم اليومي أساسي،
 بس التنظيم الأسبوعي بيعطينا فكرة عامة عن أهداف الأسبوع وكيف رح نقسم مهامنا على 7 أيام بشكل متوازن❤
 
صممت هاد المنظم الأسبوعي يلي شايفينو بالصورة بحجم A5 طبعاً باللغتين عربي وانكليزي.
 
و هيك رح يكون شكل المنظم 
 
 
 
رح يكون في ببداية الصفحة مكان للتاريخ، وهون رح نحط الشهر والسنة.
 ( تركت التاريخ بدون تحديد حتى نستخدمو للتقويمين الهجري والميلادي)
وفي 8 مربعات، أول مربع للملاحظات و7 مربعات للأيام.
بكل مربع في بالزاوية مربع صغير حتى نكتب تاريخ اليوم من الشهر.
 
من الأشياء يلي ممكن نكتبها بهاد المنظم :
◍ توزيع الدراسة والمراجعات على أيام الأسبوع.
◍ وضع خطة الطبخ بتحديد وجبات الغداء للأسبوع.
◍ تذكير بمواعيد مهمة متل مقابلة أو زيارة طبيب أو موعد اختبار … الخ
◍ بأيام العطل يلي ممكن ماعندكم فيها أي شي تكتبوه ممكن نحطو ستيكرز لمقولات محفزة أو صور بتحبوها حتى تعطي شكل مشجع للمنظم، و ان شاء الله رح صمم ستيكرات جديدة لهاد الموضوع  ❥
 
طبعاً المنظم رح تحملوه من هادي الروابط مجاناً  
 
 
 
 
 
 
وإذا ما عندكم خبرة بطباعة ورق المنظمات بحجم A5  ادخلو على هاد الرابط فيه الخطوات بالتفصيل  
 
 
ملاحظة: أنا طبعت المنظم الأسبوعي على وجه واحد وعلى الوجه التاني طبعت نسخة من المنظم اليومي،
حتى يكون في نسخة من المنظم الأسبوعي وبعدها 7 نسخ من المنظم اليومي وبعدها مرة تانية نسخة من المنظم الأسبوعي..الخ
 
 
 
2. الغسيل
 
 
 
 
لسببٍ ما حابة أذكر هاد الشي مع أنو غالباً بدهي! هههههههههههه وأكيد 90% بساوو هالعادة خلال عطلة نهاية الأسبوع بس حبيت اذكرها بكل الأحوال. >,< لأنو فعلاً هي من أهم العادات يلي بتعطي بداية نضيفة ومنعشة للاسبوع الجاية 
 
 
 

3. الأهداف الـ 3

 
من أهم العوامل يلي بتخلي الأسبوع الجاية واضح ومنظم هي تحديد الأهداف الكبيرة لكل المهام الصغيرة يلي رح نساويها خلال هدول الـ7 أيام!
 
وبظن 3 أهداف كافية وسهلة لأسبوع واحد، أنا بحدد الأهداف الرئيسية لأسبوعي وبكتبها بمربع الملاحظات يلي بالمنظم، وهادي نصيحة بتمنى تجربوها حتى تكون مخططاتكم بالمنظم الأسبوعي مدروسة أكتر ومتناسقة.
 
أمثلة عن الأهداف يلي ممكن تختاروها:
 
◑ عدد صفحات التلاوة لهاد الأسبوع (وبعدين بتقسموها على حسب وقتكم بمربعات الأيام)
◑ مراجعة مادة دراسية خلال الأسبوع.
◑ ستايل أو ثيم معين حابين تتبعوه خلال هاد الأسبوع لمواقع التواصل الاجتماعي.
◑ موعد استيقاظ لهاد الأسبوع ( هادي خطوة كتير مساعدة للناس يلي ما عندن دوام متلي >_< )
◑ الحفاظ على عادة صحية معينة خلال الأسبوع … الخ
 
 
 

4. makeover 

 
 
 
هادي العادة الحلوة كانت موجودة عند امي ❤  بكل خميس مع تنضيف البيت كانت اكيد رح تغير شي بشكل البيت!
وبصراحة هلأ بعد ما صرت ساكنة ببيت ما فيه الماما حسيت فعلاً بقيمة هاد الشي!! أحياناً تغيير بسيط بشكل الغرفة بيعطيكي شحنة ايجابية لمدة اسبوع!
طبعاً رح تكون هادي العادة من أهم العادات يلي حابة واظب عليها واكتبها بين أهدافي الأسبوعية ❤ 
ورح تحسو بتغيير وإحساس ونشاط بكميات كبيرة بسبب هالتغيير، وهالأحساس رح ينتقل لكل يلي موجودين معكم بالبيت.. 
بس نصيحة إذا كنتو ساكنين ببيت فيه امهاتكم، ما تغيرو شي بالمطبخ أكيد رح تصير كوارث ههههههههههه
 
 
 

5. تغيير العبارات المحفزة

 
 
 
بتسمعوني كتير عم احكي عن التحفيز والعبارات المحفزة وكيف بتعطي دافع دائماً للالتزام والنشاط … الخ
بس فعلياً كلنا بس نشوف جملة أو مقولة محفزة بتعجبنا وبتأثر فينا لمدة أقصاها 10 ايام وهاد شي طبيعي!
لهيك حلو خلال عطلة نهاية الأسبوع يكون في بحث عن مصدر جديد للالهام والتحفيز، وحطو هادي الجمل بمحلات بتشوفوها باستمرار متل المكتب أو المراية، أنا حطيت هادي العبارة على علبة الأقلام.
 وكل أسبوع رح نبلشو بطاقة جديدة ❤ 
 
 
الجملة يلي شافينها بالصورة فوق كانت محفزي للأسبوع الماضي ورح حاول على انستغرام وبينترست شارك محفزاتي الأسبوعية حتى تعطيكم الهام كمان ❤ 
 
 
 
 
 
شاركوني أي سؤال أو اقتراح بالتعليقات 
 
وشكراً كتير لدعمكم وتفاعلكم معي  
 
 
 
 
 
 
 
 
 
 
 
 
 
 
Advertisements

4 thoughts on “➄ easy ways for an organized week | طرق سهلة لأسبوع منظم ➄

  1. جميل جداً هالبوست وهالمدوّنة بالعموم، بعيدة عن الكلمات الإنشائية وبتفوت بـ لبّ الموضوع.
    أما بخصوص تنظيم الوقت فأنا من وقت ولادة طفلي بعاني بشكل محزن من حالة كارثية تتعلّق بفقدان التنظيم وفقدان الوقت لعمل أي شي شخصي أو حتى شي بيتعلق بالمنزل أو بالعمل. وأصبح الوقت مكرّس بشكل شبه كامل لطفلي. باشرت بالتنظيم بشكل نظري وطبعاً الفائدة ما كان بالشكل المرجو، ولما بلشت أستعمل مفكّرة وأكتب أصبح الوضع أقل سوء. حتى العبارات المحفّزة يلي على بساطة فكرتها كانت بمثابة poke يومي ألي لحتى اتنبّه لشحن طاقتي بأشياء بحبها متل القراءة والموسيقى والكتابة لحتى أرجع كرّر ودوّر الطاقة واعطيها لطفلي وبيتي والعالم المحيطة.
    اكتشفت المدوّنة بالصدفة عن طريق الانستغرام، مبسوطة بهالصدفة. وبقراءة تجربتك دائماً….والأهم بمنظّماتك يلي عالأكيد رح نزلهن كلن ❤
    تحية ألك ولســــلمى 🙂

    إعجاب

    1. سعيدة جداً بقراءة تعليقك ❤️ الخطوة الأصعب بعد الولادة هي الانفصال! يمكن أنا استغرق معي الموضوع سنة كاملة او ١٠ شهور حتى عرفت انفصل عن سلمى وارجع التفت لنفسي مرة تانية 💔
      شكراً لمشاركتك وبالتوفيق 🌟🌟

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s