منظم 2016 | 2016 planner

 2016 planner 

 
و أخيراً منظم 2016 صار جاهز! بس هالمرة رح يكون منظم جديد تماماً وبحجم جديد أسهل ومتوفر أكتر من باقي المنظمات، رح اشرح كلشي بالخطوات كالعادة مع روابط تحميل مجانية بهاد البوست ↶
 
 
 

 
السنة الماضية استعملت منظم من جرير وكان حجمو صغير فكانت طباعة الأوراق صعبة والمطبوعات ماكانت مناسبة لكل المنظمات العادية يلي ممكن تكونو بتستخدموها … وهاد البوست يلي حكيت فيه عن المنظم القديم 
 
 
 
 
ولسبب مادي بحت *.* ما قدرت اشتري منظم عادي متل هدول  
 
 
 
 
وبالرغم من اني ساكنة بألمانيا اتوقعت أني شوف مكتبات أكتر بتبيع هدول المنظمات بس للأسف متل الوطن العربي لازم نطلب أون لاين وبكون سعرها غالي كتير!!
 
*المنظم عم نستخدمو حتى ننظم أيامنا وأعمالنا بشكل أسهل، لهيك ما حبيت اتعب حالي بشكل المنظم ومن أيا شركة واضطر اتكلف عليه كتير بسعر غالي، و شفت حل بديل موجود بكل المكتبات وبكل الدول وأبداً مو مكلف!
 
 
هاد هو الحل :
 
 
 
 
شفت بالصدفة ملف عادي بس حجمو A5 وهو أكتر حجم حلو بالنسبة للمنظمات.
أنا كنت من قبل حب المنظمات الصغيرة كتير لأني اتوقعت آخدها معي دائماً وين ما بروح!
بس عن تجربة اكتشفت اني بترك المنظم بالبيت لهيك الملف رح يكون سهل للكتابة وعملي ومتوفر بكل المكتبات وأرخص بأضعاف مضاعفة!
 
 
طبعاً ممكن نعدل كتير على شكل الملف، ورح ساوي بوستات لسا ان شاء الله عن هالموضوع.
 
بس حبيت لسنة 2016 إني ركز أكتر على هدفي من المنظم أكتر من أني اهتم بشكلو..
 
المطبوعات يلي ساويتها هادي السنة كلها ِA5 يعني ممكن تستخدموها على هاد الملف أو على منظماتكم العادية، ورح اشرحلكم طريقة تانية بنهاية البوست لطباعة المنظم بكل الأحجام الباقية.
 
 
 
 

المنظم اليومي

 
اخترت الألوان لهالسنة أسود وأبيض ورمادي 
 
رح يكون شكل المنظم هيك  
 
 
بالبداية منختار أي يوم من أيام الأسبوع بزاوية الصفحة اليسار وبعدين منحدد التاريخ،
 بالمنظم اليومي رح يكون في حقل للمواعيد وحقل لعدد كاسات المياه المشروبة يومياً وحقل لقائمة المهام،
 وقائمة تسوق وبنهاية الصفحة في قائمة الفطور والغداء والعشاء ( إضافة مهمة جداً للمتزوجات) لأنو ممكن تخططي مسبقاً شو حابة تطبخي لأسبوع كامل، وتسجليها على المنظم اليومي حتى لما تبدأي بمهام اليوم تكوني بتعرفي مسبقاً شو رح تطبخي وبتكون مكونات الطبخة موجودة بقائمة التسوق 
 
كالعادة في نسخة عربي ونسخة  English وهادي روابط التحميل  
 
 
 
 

تقويم 2016

 
وهاد شكل التقويم 
 
 
 
كمان حجم A5 وفي منو باللغة بالعربية وهادي روابط التحميل 
 
 
 
وهادي الستيكرز يلي استعملتا لتزيين المنظم 
 

 

 

 

 طريقة الطباعة 

 
رح تكون الملفات يلي حملتوها كالعادة ملفات publisher
بالنسبة للمنظم اليومي لازم نطبع على الوجهين، فلما منفتح الملف رح يكون في صفحتين 
 
منختار الصفحة رقم واحد وبعدها منختار أمر طباعة أو (ctrl + p) بعدها رح تشوفو هادي الشاشة 
 
 
 
اختارو عدد النسخ 15 (لشهر واحد) وبعدها لازم نبدأ بالحقول يلي تحت كلمة إعدادات ↶ 
 
 
اختارو طباعة الصفحة الحالية، وحجم الصفحة A4 وعمودي وبعدها اضغطو على أمر الطباعة.
 
بعد ما تنطبع الـ 15 ورقة لازم ترتبو الأوراق فوق بعضها بشكل ممتاز ومرتب حتى مايصير خطأ بالطباعة بين الوجهين، وبتدخلو الورق على الطابعة مرة تانية حتى نبدأ طباعة الوجه التاني.
 
منختار الصفحة رقم 2 من الملف يلي حملتوه، ومنعيد الطباعة بنفس الطريقة بعدها بكون عنا بكل ورقة مطبوع يوم على كل وجه ( كل ورقة عن يومين)  
 
وبعد ماتجهز الورق بيبقى قص الأطراف البيض و ثقب الورق وبعدها بتستعملوه بالمنظم بسهولة.
 
 
 
 
أما بالنسبة لطباعة التقويم كمان بتعيدو نفس الخطوات يلي فوق بس الفرق أنو التقويم رح يكون على وجه واحد فقط أما الوجه التاني رح يكون أبيض.
 
 
الطباعة بالأحجام الأخرى
 
لو عندكم منظمات بأحجام تانية غير الـ A5 ممكن تدخلو على ملف الـ publisher نفسو تبع المنظم اليومي،
 
وأنا عاملة المنظم على شكل صوة ممكن تنسخو الصورة وتطبعوها على صفحة publisher تانية بالحجم يلي بناسبكم 
 
وببساطة بتعدلو حجم الصورة حتى توصل لكل أطراف الصفحة وبعدها اطبعو بنفس الطريقة يلي مذكورة فوق تماماً..
 
 
ان شاء الله بكون هاد المنظم أسهل عليكم ومتوفر عندكم بسهولة 
 
وأي سؤال أو استفسار اكتبوه بتعليق وأنا بساعدكم فيه مباشرة إن شاء الله 
 
 
 
 
 
Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s