طريقة عمل مفكرة يومية | DIY daily planner

بهاد البوست رح احكي عن هوسي الجديد ◕‿◕
 
 
يلي متابعيني على instagram  أكيد بيعرفو أديش حابة هادي المفكرة الجديدة لأني هلكتن بصورا هههههههه
بصراحة صرلي شهور بشوف صور حلوة كتير لمفكرات بجننوووو ✮.✮ بس للأسف دورت كتير ومالئيت متلن بمكتبات جدة، وماكان في حل غير اني اطلبا من مواقع أجنبية وطبعا بتكون كتلكفة كبيرة 
 
طبعاً الشكل الحلو مانو الهدف الأساسي لهوسي بالمفكرات ههههههههه بس لأنو عنجد عندي ايمان بالفرئ الايجابي الكبير يلي بيجيني من ورا تنظيم وكتابة المهام والمواعيد والأفكار الخ…
 
لهيك ساويت مفكرتي لحالي من الصفر ورح اعطيكن الخطوات حتى تجربو الفكرة لأنو عنجد كتير بسيطة وكتير ممتعة ومفيدة 
 


 
 
أول شي أنا طبعاً ما شفت مفكرات أبدا بالمكتبات وحتى بجرير لهيك صرت دور على حيلا دفتر يكون حجمو صغير نوعاً ما واقدر شيل وحط ورق فيه بسهولة. وهاد هو الخيار الوحيد يلي شفتو *.*
 
 
 
نعم نعم، إنه دفتر تلفونات وعناوين هههههههههههههههههههه
بس بيمشي حالو 
 
الدفتر جبتو من جرير ب29 ريال وهو نفسو يلي فوء بأول صورة بالبوست.
شلت كل الورق الي فيه تركت الورق يلي ممكن يلزم متل صفحات الملاحظات، طبعا مارح اترك شكلو هيك رسمت عليه بقلم دهان دهبي اسمو edding751 بشوفو بكتير مكتبات وبظن سعرو 9 ريال (هالقلم عنجد كتير مهم لأنو بساوي كلشي حلو هههههه)
 
بعدين أخدت قياس الورق يلي بالدفتر وصممت أوراق بنفس الحجم، كل صفحة بتكون خاصة بيوم من الشهر وصممت مبدئياً ورق لشهرين آذار ونيسان. سئلت على الانستغرام كيف بتفضلو تكون لغة عربية أو انكليزية؟ وشفت الاجابتين ههههههههه لهيك ساويت من كل شهر نسخة عربي ونسخة انكليزي حتى كل شخص يستعمل يلي بحبو 
 
>>> الخطوات بالطباعة لازم تكون كتير دقيقة وتماماً متل ما رح حط الخطوات لأنو لازم كل ورقة نطبعها تكون نفس الشكل من الجهتين حتى تنقص بشكل زابط وتكون صفحات الدفتر مرتبة <<<
جهزت الصفحات بملف publisher لسهولة الطباعة ورح حط الروابط تحت.
 
رح يكون كل ملف فيه صفحتين لشهر معين متل: 


هدول الصفحتين لشهر آذار، رح نطبع كل صفحة على وجه من نفس الورقة. 
(يعني على أول وجه للورقة رح نطبع الصفحة رقم 1، وعلى الوجه التاني رح نطبع الصفحة رقم 2)

الحلو ببرنامج الpublisher انو بخلي الصفحة المطبوعة بمركز الورقة تماماً يعني لما رح نقص الورقة رح تكون نفس الطباعة والحجم من الجهتين.

ببداية الصفحة رح تشوفو التاريخ، وتحتو في عبارة: “today i choose to be” تركت بعدا دائرة حتى تحطو كلمة توصفو فيها كيف حابين تكونو اليوم (نشيطة، مرحة، متفائلة..) أو ترسمو سمايلي ليعبر عن الحالة.

وجنبو في خيارين: عمل أو راحة اختارو الخيار يلي حابين يكون يومكن على اساسو ❥

 
الخطوة الأولى:
 
تحميل الملفات:
 
ساويت من كل شهر نسختين وحدة عربي ووحدة انكليزي، اضغطو على اسم الشهر حتى ياخدكم على موقع التحميل 
 
 
 
 
 
 
 
 
 
الخطوة الثانية:
 
طباعة الصفحة رقم 1:
لما بتفتحو ملف الشهر على الصفحة 1 اضغطو ctrl + p أو اختارو الأمر طباعة.
رح تطلع نافذة متل هادي الصورة ولازم تحطو نفس الخيارات يلي عليها إشارة تماماً
 
 
لو حابين تطبعو ورق للشهر كامل بكفي تحطو 8 نسخ بأول مربع فوق
 
بعدين بتضغطو على مربع طباعة.
 
 

الخطوة الثالثة:






بعد ما نطبع رح ناخد الورق ونقلبو (يعني يكون باتجاهنا وجه الصفحة الفاضي وباتجاه الطابعة وجه الصفحة المطبوعة)

ونعكسو (يعني الطرف يلي فوق نساويه تحت والكتابة تبين بالمقلوب) ومنحط الورق المعكوس والمقلوب بالطابعة حتى تطبع الصفحة التانية.



الخطوة الرابعة:



رح نطبع الصفحة رقم 2 بنفس الطريقة يلي بالخطوة الثانية.



الخطوة الخامسة:

بكل ورقة رح يكون عنا ورقتين للمفكرة منقص الزوائد وبعدين بدنا نثقب الفتحات حتى نحط الورق بالمفكرة.



حتى أعرف تماما وين لازم تكون الفتحات، أخدت صفحة من الصفحات الأصلية يلي كانت بالمفكرة.






حطيت الورقة الأصلية فوق الورقة يلي طبعناها وثبتا منيح بمشبك.

وبعدين ثقبت فوء الفتحات يلي كانت بالورقة الأصلية.

وهيك صارو صفحات الشهر جاهزين ❥




مع كل شهر رح تشوفو الصفحة رقم 3 فيها بطاقة صغيرة هادي البطاقة فيها روزنامة الشهر كامل بشكل صغير حتى ماتضيعو بالتاريخ. طريقة طباعتها كتير عادية 




وبنفس الطريقة منقصها ومنثقبا.



بيبقى ورقة الأهداف السنوية أو my 2015 goals

اول شي منطبع الصفحة رقم 1 بنفس طريقة طباعة البطاقة يلي فوق، وبعدين مناخد الورقة المطبوعة منقلبها ومنعكسها ومنرجعها على الطابعة لنطبع الصفحة رقم 2 كمان بنفس الطريقة، وبعدها منقص ونثقب وبتكون جاهزة. ❥❥



أنا ساويت مبدئياً بس شهرين حتى أقدر اعطيكم الملفات بأسرع وقت ولأني حابة جرب تصاميم جديدة بالشهور القادمة ان شاء الله ❥ 



لسا رح يكون في كتير ستيكرات واكسسوارات للمفكرة بالبوستات الجاية ان شاء الله، وحتى تعرفو ايمت رح تنزل البوستات تابعوني على instagram : @hope_is_handmade 

google+ :  +hope_is_handmade 






Advertisements

One thought on “طريقة عمل مفكرة يومية | DIY daily planner

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s