طريقة عمل أختام (ستامبات) | how to make rubber stamps

صناعة الأختام (الستامبات) من أحلى الشغلات يلي بعد ما ساويها بشوف ألف استخدام مفيد وجديد منها 
 
 
↞ رح حاول اشرح الطريقة بأبسط شكل وأبسط أدوات، وبالبوستات الجاية ان شاء لله بصير بحط الأدوات الاحترافية وخطوات معقدة أكتر. 
 

 


 
بالبداية حتى تعرفو شو هو نحت الأختام (الستامبات)
 
هو استخدام خامات بسيطة متل المحايات حتى نساوي منها ستامب ونكرر طباعة نفس الشكل لمرات لا نهائية :p
 
(تعريف مهم هههههههههه) 
 
رح بلش بالأدوات
اخترت الأدوات لهالبوست تكون كتييير بسيطة ومتوفرة 
 
 
 
1. محايات (يكون حجما مناسب لحجم الستامب الي حابين تساووه)
2. ورق شفاف لنسخ الشكل الي رح نحفرو على المحاية
3. حبر الأختام
4. صمغ سائل
5. مشرط
6. أعواد خشبية (متل تعيت الآيس كريم هههههههههههه)
 
 
الخطوات
1. رسم التصميم على الورق الشفاف بقلم رصاص
 

 

 
أنا رسمت هالرسمة لأني رح استعملها على ستيكرز صغار وحطا بمفكرتي على اليوم يلي لازم فيه اغسل تيابي ههههههه
 
2. بعدين رح ننقل الرسمة على المحاية 
بس منقلب الورقة يعني منخلي الوجه يلي رسمنا عليه يلامس المحاية 
ومنضغط على الورقة بحركات بطيئة بالقلم حتى تنتقل الرسمة عالمحاية
 
 
3. هيك بتكون صارت الرسمة موجودة على المحاية بس معكوسة طبعا 
أنا رجعت رسمت فوقها بقلم أسود حتى تكون واضحة أنا وعم احفر فيها وقصيت القسم الزايد من المحاية.
 
 ⊗ هلأ أخطر مرحلة 
😀 وأبداااً مابنصح حدا عمرو تحت ال15 سنة بأنو يجرب هادي الطريقة لأنو المشرط خطير بأدين شخص مابيعرف يستخدمو 
 
 أنا بدي الرسمة يلي باللون أسود تكون بارزة وكلشي حوليها باللون الابيض لازم أحفرو، ورح بلش بحفر القسم الأبيض الي جوا.
 
4. بخلي المشرط ينزل على المحاية بشكل مايل متل الصورة وبمشي على حرف الخط الأسود لحتى يخلص وأرجع لنقطة البداية وبتكون وقتها القطعة البيضا يلي بالنص منفصلة عن باقي المحاية.
 
 
5. منكرر نفس الطريئة لنشيل الزوايد يلي على طراف الرسمة
 
 
 
6. منقص الأطراف الي ما لازمة من المحاية
 
وبعدين منجرب نطبع فيها لنعرف وين في أخطاء لازم نصححها.
 
 
هيك بتبين معنا كل الأخطاء يلي بالحفر، منساوي التعديلات الأخيرة ومنجرب لحتى يكون شكل الختم نضيف وجاهز.
 
7. منطبع بالختم على بداية عودة الخشب حتى نميزها بسهولة.

 

8. وبعدين منحط صمغ ساىل على الجهة التانية من العودة ومنثبت الختم عليها.





هيك صار جاهز الستامب 

أنا استعملت هاد الستامب لساوي فيه ستيكرات لمفكرتي ↶

مجرد اتعودتو على استخدام المشرط رح يكون عندكم خيارات واستخدامات للستامبات لا نهائية ❥

وبالنسبة للأعواد الخشبية ممكن تستغنو عنها، بس أنا بحبها لأنو بتخلي استخدام الستامبات أسهل وتخزينها أحلى ❥

 

هادي أول طريقة لأول نوع من الستامبات ولسا ان شاء الله رح يكون في بوستات أكتر بهالموضوع ❥

↞ أي سؤال أو اقتراح اكتبوه بتعليق تحت وأنا بجاوبكم عليه ان شاء الله ↠

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s