ستيكرات وأفكار لتزيين المفكرة اليومية | stickers & ideas for daily planners

بهاد البوست رح تعرفو الطريقة يلي ساويت فيها كل هدول الشغلات الحلوين يلي بالصورة تحت 
 
 
بالبوست الماضي حكيت عن مفكرتي وكيف ساويتا مع مطبوعات لشهر آذار ونيسان، يلي لسا ماشافوها هاد رابط البوست 
 
وهلأ رح احكيلكم عن الأدوات يلي ممكن نستعملها لنخلي التنظيم بالمفكرة ممتع أكتر وشكلو أحلى 
 
بكل الصور والأدوات يلي رح تشوفوها هلأ رح تكون المواد المستعملة كلها متوفرة بكل بلد وأسعارها رمزية حتى مانكون اهتمينا بشكل المفكرة والاكسسوارات بشكل مبالغ فيه، أما لو كنتو حابين تتوسعو بهاد المجال أكتر من الناحية الفنية أكيد رح تشوفو خيارات كتييييرة وبتجنن بالمكتبات متل الستيكرات والفواصل والمشابك وورق الملاحظات …. الخ
 


 
 
أول شي حابة احكي عنو وهو أكتر شي مفضل عندي وبستعملو بشكل يومي 
المشابك
 
 
شكلن بجـــنـــن ❤ وبستعملن لعلم فيها الصفحات المهمة يلي بفتحا باستمرار.
وببين شكلن طالعين من صفحات المفكرة كتير كتير لزيزين 
 
طريقة عمل المشابك سهلة وبسيطة ومابتاخد 3 دئايئ، رح يلزمكم فيها :
☄ مشابك الورق ( المشابك الدهبية شكلا احلى وارتب بكتير من المشابك الملونة بس ممكن تختارو يلي بتحبوه وبناسبكم )
☄ خيوط التطريز ( أنا حبيت شكل الخيوط الرفيعة أكتر من خيوط الكروشيه العريضة بس كمان ممكن تختارو يلي بناسبكم)
☄ صمغ (اختياري)
 
شرح الخطوات يلي بالصورة فوء: 
 
1. قصيت مجموعة خيوط تقريبا 30 خيط بطول 17 سم 
2. دخلت الخيوط بطرف المشبك وقسمتن بالنص (كل طرف 8 سم تقريباً)
3. أخدت خيط واحد بطول 10 سم تقريبا ولفيتو منيح على الخيوط من بدايتها وربطتو بعقدتين فوق بعض.
4. قصيت الزوائد يلي بالخيط وحطيت نقطة صمغ صغيرة فوق العقدة حتى ما تنفك مع الاستعمال.
5. قصيت نهاية الخيوط كلها بشكل مستقيم وترتكت طولها 4 سم (ممكن تختارو طولها متل مابناسبكم بس ال4 سم مثالي للمشبك)
 
 
هاد الموضوع بتقدرو تحطو فيه ابداعاتكم بخيارات لا نهائية، يعني ممكن تساووها بخيوط من ألوان مختلفة أو بخيط من لون واحد ، ممكن تستعملو مشابك ملونة أو دهبية أو فضية، ممكن تستعملو شريطة بدل الخيط متل ما أنا حاطة بالصورة يلي فوء استعملت شريطة دهبية، أو حتى تستعملو شريط لاصق ملون… الخ 
ابدعو فيها  لأنو متأكدة رح تستعملوها كتير للمفكرة أو للدفاتر المدرسية أو لأغراض تانية بتخص التزيين  
 
 
الملصقات | stickers
 
مبدئياً حاولت صمم الستيكرات الاساسية يلي بتلزم كتير لتسهيل التنظيم بالمفكرة 
 
 
 
ساويت نسخة بالعربي ونسخة انكليزي كالعادة.
حطيت ملصقات يلي شكلها مثلث عليها كلمة هام\important حتى نستعملها للتنبيه على انو في موعد أو مهمة مهمة بهادي الصفحة.
وفي علامات التبويب يلي منستعملها على طرف الصفحة حتى نقدر نفتح هادي الصفحة مباشرة وقت منشوفها بارزة من طرف المفكرة.
حبيت اترك ملصقات ملونة فاضية (يلي على شكل قطرة) حتى تكتبو فيها أي شي حابين تذكروه.
وأخيراً في ملصقتين للملاحظات.
وهادي روابط اضغطو عليها لتحميل الستيكرات 
 
 
 
 
 
ملاحظات هامة:
☄ أنا استعملت ورق ستيكرز للطباعة (ورق أبيض عادي بس بكون من ورا لاصق)
بس ممكن تستعملو ورق عادي وتستعملو صمغ أي نوع لاصق. هاد هو الورق أخدتو من جرير ب30 ريال وفيه 25 ورقة
 
 
بس انتبهو أنو يكون مكتوب عليها من تحت full sheet لأنو أغلب اوراق الستيكر بتكون مقسمة لستيكرات صغيرة
 
☄ الملفات يلي رح تاخدو منها الستيكرات هي ملفات publisher يعني ممكن تحذفو الستيكرات يلي ماحبيتوها وتنسخو الستيكرات يلي عجبتكم حتى تطبعوها 
 
☄ يلي ماعندو طابعة ممكن بسهولة تساوو ستيكرات من هدول يلي بتشوفون موجودين بكل مكتبة 
 
 
والبوست الجاية ان شاء الله رح يكون كلو عن حلول بديلة للي ماعندن طابعة 
 
وهادي صورة استعملت فيها الستيركات والمشابك 
>> وكانت أحشائي ممتلئة بالحب ❤ <<
 
 
 
 
آخر شي رح احكي عنو هو 
 
الفواصل | binders
 
طريقة عمل الفواصل كتييير سهلة وكمان فيها مجال كبير حتى كل شخص يساويها باسلوبو ويطالع افكارو فيها 
 
الفواصل أو binders \ dividers هي الصفحة الفاصلة بين كل قسم وقسم بالمفكرة.
كتير حلوة لما بتكون بتصاميم مختلفة حسب القسم يلي هي بتكون ببدايتو 
 
الخطوات:
1. اختارو نوع الورق يلي حابين تساوو منو الفاصل (الورق المقوى افضل شي)
2. خدو فاصل من الفواصل الأصلية الموجودة بالمفكرة وحددو حوليها بقلم رصاص 
3. قصو حسب الشكل الي رسمتوه وبعدين اثقبو الفتحات بنفس الطريقة يلي ساوينا فيها أوراق المفكرة بالبوست الماضي.
4. زينو الفاصل بأي شكل بتحبوه متل الكتابة عليه أو الرسم أو تحطو عليه ستيكرز… الخ
 
أنا ساويت هاد الفاصل وزينتو برسمة عملتا من أوراق المجلة، وهاد الفاصل رح استعملو لقسم الي بكتب فيه الالهام لهيك كتبت تحت inspire 
 
 
هدول أول مجموعة للأفكار الخاصة بتنظيم المفكرة ➵
ولسا في أفكار كتيرة بتشوفوها بالبوستات الجاية ان شاء الله 
 
Advertisements

2 thoughts on “ستيكرات وأفكار لتزيين المفكرة اليومية | stickers & ideas for daily planners

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s