أسئلة نوفمبر 🌬

كنت عم فكر بالأشياء الي كانت مفضلة عندي بشهر نوفمبر، ما حسيت أنو صار في علاقة حلوة بيني وبين حيلا شي جديد بهالشهر 🤷🏻‍♀️

بس كان عندي الكثير والكثير من الأسئلة ✨

طبعاً ما شفت أجوبة لكل الأسئلة! بس كانت أسئلة عميقة وكتيرة بالنسبة لشهر واحد 🌚

لذلك ☝🏻 رح اكتبها هون لأنو هالأسئلة حسيتها كانت سبب بتوسيع الأفق أو وعي بأشياء مدفونة بعقلي الباطن من زمان وممكن تفيدكم أو تعطيكم الهام تساوو نفس جلسة الأسئلة 🤷🏻‍♀️

ملاحظة: رح اكتب الأسئلة بدون الأجوبة مشان يبقى سحر بالموضوع 💫

س١: ليش غالباً أنا بعرف المعلومة وبرددها بس نادراً ما نفذها؟

س٢: ليش بقدر حلل موقف خاطئ لحيلا شخص وطالع دوافعو ونواياه، بس نادراً ما اسمح لشخص يقول عني غلطانة ويشرحلي دوافعي ونواياي برأيو؟

س٣: شو السر بتحكم الذكور بالإناث؟ ظلم من الرجل أم خضوع من المرأة؟

س٤: اذا بقيت عم قيم الأشخاص وانكش عيوبهم واقصيهم من حياتي بسبب قلة الكفاءة! رح ابقى وحيدة بالنهاية؟

س٥: ايمت بقدر استسلم؟

س٦: وايمت لازم اندم؟

س٧: وين الصعوبة بالاستمرارية وليش تحقيقها شبه مستحيل؟

س٨: عنجد خلص الخريف بهالسرعة؟؟! 😅

س٩: ليش بفيق كل يوم وبنتظر شخص يدعمني ويعطيني طاقة لأبدأ يومي؟ ليش أنا مابعرف ادعم حالي؟

س١٠: لو كل شخص عندو تعريف خاص بالحب، كيف ممكن يكون في أرضية مشتركة لعلاقة محبة بين شخصين؟

س١١: شو الفرق بين التسليم والاستسلام؟

اكتفيت بـ ١١ سؤال حتى يناسبو شهر نوفمبر 🌚

وفعلياً باقي شهر لنهاية السنة وهادي مرحلة تقييم عظيمة بتستدعي هالأسئلة وزيادة 😂💔

شو في اسئلة عميقة خطرتلكن هالشهر؟ 🤔

خاروف سلمى 🐑

إذا بتتذكرو البوست القديم عن روتين نوم سلمى 👇🏻

baby sleep routine | روتين نوم الاطفال

حكيت فيه عن تجربتنا بخلق روتين نوم لسلمى من لما كان عمرها ٦ أسابيع تقريباً ❤️

كانت تجربة حلوة وممتعة جداً 💫 (وأكيد فيها بعض التعب متل كل التجارب التربوية 🤷🏻‍♀️🌚)

بس كنت بعمر الـ٦ أسابيع لف سلمى وئت النوم بغطا كتير رقيق حتى ما تخاف كل شوي من حركة ايديها، وطبعاً قرأت كتير عن هالموضوع وهو حل كتير مساعد للأطفال يلي بعد الولادة بيكون عندهم انعكاسات عصبية كتير قوية وبتستمر معهم وقت أطول…

وبقيت سلمى تنام بهالطريقة للمرحلة يلي صارت فيها بتقدر تقلب على جنبها، وبهادي المرحلة لازم التخلي عن اللفة مباشرة لأنو بتبلش تشكل خطر بالاختناق، بحال قلب الطفل على وجهو وايديه مربطين ما رح يعرف ينقذ نفسو من الاختناق 💔

بس طبعاً التخلي عن عادة اللف كان كتير صعب بالنسبة لسلمى، وبدأت معها بتحرير ايد وحدة ولف الايد التانية لمدة كم يوم.. ووقتها صارت تلتهي بايدها كتيـــر وتتنشط وتطلع من مود النوم تماماً 😂😂🌚

وبوقتها قرأت كتير نصائح أخصائيين بهاد المجال وكان الخاروف هو الحل!

هادي اللعبة آمنة بنسبة كبيرة للاحتضان وقت النوم وخصوصاً انو هي عبارة بشكل رئيسي عن منديل طري وناعم ورقيق وعليه راس خروف فقط، يعني ما بيشكل مخاطر بالاختناق طالما هي تحت عيني باستمرار وأول ما بتغفا بخليه جنبها بس بعدي عن وجهها تماماً.

بالبداية كانت سلمى تحضنو كتير وتلعب فيه بدل ما تحرك ايديها بحماس 😂💔

و ما كنت اعطيها ياه خلال النهار أبداً! بترك الخاروف للسرير حصراً حتى بس تشوفو سلمى تعرف انو اجا وقت النوم ويصير روتينها ثابت أكتر ويعطيها استقرار نفسي 💫

ونجحت هالحركة ١٠٠٠٠٪؜ 🙌🏻

وقدرت وأخيراً اتخلى عن لفة سلمى بعمر الـ٤ شهور تقريباً 🙌🏻

وصارت مستحيل تنام بدون الخاروف 💔

الشيء الغير متوقع:

انو صار في علاقة كتير حنونة بس سلمى والخاروف!

أحياناً سلمى بتسرق الخاروف من السرير وبتركد فيه بكل البيت! ومن بين كل الالعاب الخاروف هو النجمة المميزة 🌟

حبيت هالعلاقة كتير ! وعطتني الهام كتير كبير بالمقابل ❤️

وساوت نوم سلمى اريح وأهدا وأحلى ❤️

صديقي سليم 🌻

مبارح كانت أول منشتري فرشة لتختنا 😂😂😂💔

اي من لما اتزوجنا ما صارتلنا فرصة نجهز ونفرش بيتنا وسكنا ببيت قديم كتير ومفروش فرش لسا أقدم وبقينا سنة وشهرين نايمين على صوفا مفتوحة ومعتبرينها تخت 🌚

رح ارجع شوي بالأحداث لورا:

Continue reading “صديقي سليم 🌻”

اعترافاتي لسلمى بيوم ميلادها الأول 🌟

صديقتي الجديدة سلمى:

أجمل احساس عطيتيني ياه أنو مانك جزء مني! ما بتشبهيني بالشكل أبداً، وكمان أغلب طباعك ما بتشبهني 🤷🏻‍♀️

وهالاحساس كتير حلو لأنك وفرتي علي الوقت حتى اتأقلم مع كونك كيان وعقل مستقلَين ❤️

ومن بداية مشوارنا سوا كنتي كتير مميزة بالنسبة إلي ✨

ببداية شهور حملي كان عندي احساس حاسم بأني حامل بصبي وبالشهر الخامس عرفت انك بنت ❤️ وكانت أعظم فرحة على الاطلاق ❣️

وكانت حركتك كتيرة بالشهر التامن من الحمل وهالسبب خلا الدكاترة يعتقدو باحتمال حدوث ولادة مبكرة بس انتي قررتي تبقي ٩ شهور كاملين واسبوع ببطني

عطوني مدة ٦ ايام بعد نهاية الشهر التاسع كفرصة أخيرة لولادة طبيعية بدون تحريض، بس انتي قررتي عند نهاية المهلة بالضبط انك توفري علي التحريض وتجي على عالمنا بسلام 🌟

وأول لحظات لئلك بين أيدي ما بكيتي أبداً!! وبقيتي بحضني أكتر من ٥ دقائق عم تبادليني نظرات الاستغراب والفضول بكل هدوء 💔💔

كان شعرك كتــيــر طويل وحلو وأسود لامع ✨ وكنتي حجمك كبير مقارنة بالاطفال يلي بعمرك، وهالشي خلا علامات الاستغراب تجيكي من كل الاشخاص أول ما يشوفوكي ❤️❤️

ومن تاريخ ٤/١١/٢٠١٦ سمعت جملة “zu viel haare!!” وجملة “ein großes mädchen!!” من الناس الألمان ألف تالاف مرة 😂🤷🏻‍♀️

وكتير حاولنا معك حتى تأعدي بس كنتي عصبية وتحبي تبئي نايمة على ضهرك او على جنبك وبعدين فجأة لما كان عمرك ٦ شهور جربت وأعدتك على الأرض وطلعتي بتعرفي تأعدي لحالك مابعرف كيف! 🤷🏻‍♀️

وعندك ردات فعل مميزة بتساويها لما بتعصبي، بس مامنعرف أبداً كيف اتعلمتيها او ليش؟!

متل لما بعد كل كلمة “لا” لازم تعضي الشي يلي بين ايديكي 😂

ومتل لما بس تسمعي حدا عم يضحك بصوت عالي بتصيري بتصرخي علينا وكأنك مزعوجة من صوتنا! 😂

أنا كتير فرحانة باختلافك واستقلاليتك وشخصيتك الحلوة ❤️

وكتير بحب كيف بتعطيني حنان أكبر من يلي بعطيكي ياه!

وكتير بحب الدافع يلي بتعطيني ياه حتى اشتغل على حالي اكتر و اقدر نال إعجابك بس تكبري ❣️

أشيائي المفضلة في شهر أوكتوبر 🍁

أنا -وبشكل رسمي- اعتبرت أنو الخريف انتهى 😂💔

من يومين كانت درجة الحرارة -٢ بالليل وهاد دليل كافي بالنسبة إلي على نهاية الخريف 🤷🏻‍♀️

ولأنو شهر أوكتوبر هو دائماً شهري المفضل بالسنة رح شارك معكم وبعد طول انقطاع مفضلاتي للشهر الماضي 🍁🌚

Continue reading “أشيائي المفضلة في شهر أوكتوبر 🍁”

شوربة اليقطين 🎃

وأخيراً شهر أوكتوبر ✨

على فكرة من السنة الماضية وأنا آخدة هالصور يلي رح تشوفوها بالبوست وكنت بدي شاركها معكم بس يمكن بوئتها كانت نهاية الشتوية وحسيت الموسم أبداً مو مناسب 😂

Continue reading “شوربة اليقطين 🎃”

شوفان مع التفاح والقرفة 🍎

بهالأيام من السنة كلشي فيه قرفة بيعطي جو دافي وحنون 💔🍂

وهالوجبة تحديداً بتتحضر بسرعة وطعمتها كتير طيبة وصحية وبتتساوا كوجبة مشتركة للأطفال والكبار سوا ❤️

Continue reading “شوفان مع التفاح والقرفة 🍎”

الخريف وجوارب الصوف 🍂

من بداية شهر أيلول/سبتمبر بلشت وراق الشجر تنزل بشكل سحري 🍂✨

وما بقدر اوصف فرحتي أبداً أبداً، بس رح جرب 🤷🏻‍♀️

بحس تماماً كأنو قلبي صار كتـــيــر كبير وفي جواه نجوم والكثير من مربى البرتقال والقرنفل والقرفة 💔

وبخريف السنة الماضية كنت حامل بسلمى بالشهر التامن وحاولت كتير اني اتعلم ساوي جرابات صوف، وقضيت سنة كاملة من المحاولات الفاشلة 😂💔

بس هالسنة لقيت الطريقة المثالية ورح شاركها معكم ❤️

Continue reading “الخريف وجوارب الصوف 🍂”

وجبات مشتركة ❤️

رح احكيلكم قصة سريعة 😅

يوم الاثنين قررت أختي المتعاطفة جداً “فاطمة” تساعدني بالتصوير لبوست صرلي فترة حابة احكي عنو 🙌🏻

كانت رح تصورني أنا وعم جهز “الوجبات المشتركة” و بعدين تصورنا أنا وسلمى نحن وعم ناكل الوجبة وتخلينا نبين كيوت 😂😂

المهم كانت المكونات الرئيسية بروكلي و بطاطا حلوة 🤷🏻‍♀️ وأنا صرلي فترة بساويها ومنستمتع فيها كتير، ودائما بتجيني اسئلة عنها بالستوري على الانستغرام ❤️

بس يومها ماكان عندي ولا شي من المكونات الرئيسية 😂😂

ولما كانت جاية لعندي فاطمة التها تجبلي معها بروكلي وبطاطا حلوة من السوبر ماركت يلي جنبي 💁🏻

المهم جابتلي بروكلي بس مافي بطاطا حلوة 💔

بس أنا قلت عادي بس يجي سليم على البيت بذكرو يجبلي ياها معو 😌

بعدين حكاني سليم قبل ما يطلع على البيت وقلتلو كل الاغراض يلي لازمتني ونسيت البطاطا الحلوة 😂😂😂

لما حكيتو مرة تانية لاطلبها منو كان طلع بالباص جاي على البيت 💔

ويا حرام زعل علي وتعاطف معي 😂😂 فقرر يروح على السوبر ماركت يلي جنبنا ويشتريلي من هنيك! وهو هاد نفس السوبر ماركت يلي ماشافت فاطمة عندهم البطاطا الحلوة 😂😂😂😂

حكاني من هنيك وقلي والله ما لقيتها عندهم 💔💔

قلتلو عادي مو مشكلة عندي بالبيت بطاطا عادية باستعملها بدل الحلوة 🤷🏻‍♀️

المهم اجينا وقت التصوير طلعت خالصة من عندي البطاطا العادية كمان وأنا نسيانة 😂😂😂😂

أنا آسفة كتير على هالقصة المملة بس حبيت تعرفو السبب انو الصور فيها بروكلي فقط 💔

Continue reading “وجبات مشتركة ❤️”

مكان الأحلام واللعب

بهاد البوست رح احكي عن منقذي الجديد 💔💔

سرير سلمى يلي اشتريناه من فترة، واعتبرناه مجرد سرير عادي وبعدين اكتشفنا استخدامو الأعظم 🙌🏻

Continue reading “مكان الأحلام واللعب”